Միացյալ Նահանգների երկրորդ խոշորագույն ավիափոխադրողը՝ American Airlines-ը, պայմանավորվել է Boeing ընկերության հետ 2019 թ.-ին Boeing 737 MAX ինքնաթիռների թռիչքների դադարեցման հետ կապված ֆինանսական կորուստների փոխհատուցման վերաբերյալ, հայտնում է «ՌԻԱ Նովոստին»:
Համաձայնագրի մանրամասները դեռ չեն բացահայտվել, բայց, ըստ American Airlines-ի հայտարարության, 2019 թ.-ի ավիաընկերության շահույթի բաշխման ծրագրին կավելացվի ավելի քան 30 միլիոն դոլար, որը, ինչպես նախատեսվում է, կբաժանվի ընկերության աշխատակիցների միջև 2020 թ.-ի մարտին:
737 MAX ինքնաթիռների թռիչքները դադարեցվել են 2019 թ.-ի մարտից՝ երկու ավիավթարներից հետո, որոնց հետևանքով 346 մարդ է զոհվել: Ենթադրվում է, որ վթարների պատճառը համակարգերից մեկում առկա թերություններն են, որոնք ճիշտ չեն աշխատել և աղետի պատճառ են դարձել՝ չնայած օդաչուների գործողություններին:
American Airlines-ը հետաձգել է ինքնաթիռների շահագործումը մինչև 2020 թ.-ի մարտի 5-ը: