«Իսլամական պետության» դեմ պայքար մղող ԱՄՆ-ի կողմից ղեկավարվող դաշինքը հայտարարել է Իրաքից զորքերը դուրս բերելու մասին։ Այս մասին հաղորդում է Reuters գործակալությունը՝ հղում անելով ԱՄՆ ծովային հետևակի կորպուսի գեներալ, Իրաքում խմբի հրամանատար Ուիլյամ Սիլի նամակին։
Իրաքի խորհրդարանի պահանջին համապատասխան՝ դաշինքը սկսել է պետության սահմաններից զորքերի դուրս բերման նախապատրաստական աշխատանքները, ասվում է նամակում։
Պենտագոնի մամլո ծառայությունում հայտարարել են, որ չեն կարող անմիջապես հաստատել նամակի իսկությունը։
Ավելի վաղ հաղորդվել էր, որ Իրաքի խորհրդարանը բանաձև է ընդունել, որով պարտավորեցրել է կառավարությանը դադարեցնել երկրում օտարերկրյա ուժերի ներկայությունը։
