Մեծ Բրիտանիայի ընդդիմադիր քաղաքական գործիչները քննադատել են վարչապետ Բորիս Ջոնսոնին Կարիբներում իր հանգիստը չընդհատելու համար՝ Իրաքում իրանցի գեներալ Ղասեմ Սոլեյմանիի սպանությունից հետո: Միացյալ Թագավորությունում բռնկված քաղաքական սկանդալի մասին գրել է The Mirror-ը:
Լեյբորիստական կուսակցության առաջնորդ Ջերեմի Քորբինը քննադատել է Ջոնսոնին՝ հայտարարելով, որ նա պետք է անհապաղ վերադառնար արձակուրդից, որպեսզի «լուծեր խնդիրը, որը կարող է լուրջ հետևանքներ ունենալ Բրիտանիայի և ողջ աշխարհի համար»: Նրա կուսակից Էմիլի Թորնբերին վարչապետին մեղադրել է Cobra-ի՝ կառավարության արտակարգ իրավիճակների հանձնաժողովի նիստերին մասնակցելու փոխարեն, արևայրուք ընդունելու մեջ: Նմանատիպ դիրքորոշում է ունեցել նաև լիբերալ դեմոկրատների առաջնորդներից սըր Էդ Դեյվին, որը նշել է, որ այս թեմայի վերաբերյալ կառավարության ղեկավարի երկար լռությունն անընդունելի է:
The Times-ը հաղորդում է, որ Ջոնսոնը հանգստանում էր Կարիբյան ծովի Մյուստիկ կղզում, որը Սենթ Վինսենթի և Գրենադինների մի մասն է, բայց մասնավոր տարածք է: Հանգստավայրը, որպես կանոն, սպասարկում է ամենաբարձր մակարդակի զբոսաշրջիկներին՝ բարձրաստիճան պաշտոնյաներ, բրիտանական թագավորական ընտանիքի անդամներ, խոշոր գործարարներ, արվեստագետներ և այլք: Ոչ մեծ կղզու վրա կառուցվել է 114 վիլլա, որոնց մեծ մասը վարձակալությամբ է տրվում հանգստացողներին, և ընդամենը երկու հյուրանոց, ընդհանուր առմամբ, 22 համարով: Այստեղ արգելված է նոր տներ կառուցելը, ինչպես նաև մեքենաներով տեղաշարժվելը՝ աղմուկ չառաջացնելու համար: Մյուստիկի ափամերձ ջրերն ու լողափերը պարեկում են բրիտանացի զինվորականները: