ՅՈՒՆԵՍԿՕ-ի գլխավոր տնօրեն Օդրի Ազուլեն հանդիպել է կազմակերպությունում Իրանի մշտական ներկայացուցիչ Ահմադ Ջալալիի հետ։ Հանդիպման ընթացքում քննարկվել են Մերձավոր Արևելքում լարվածության աճը և մշակութային տեղանքների համար հնարավոր հետևանքները՝ գրում է ria.ru-ն:
«Գլխավոր տնօրենը հիշեցրել է Ռազմական բախումների դեպքում մշակութային արժեքների պաշտպանության մասին 1954թ. կոնվենցիայի դրույթները և Համաշխարհային ժառանգությունը պաշտպանելու մասին 1972թ․ կոնվենցիան: Միացյալ Նահանգները և Իրանը վավերացրել են երկու փաստաթղթերը»,- հայտարարել է միջազգային կազմակերպությունը:
Այնտեղ հիշեցրել են, որ 1972-ի կոնվենցիայի համաձայն՝ իրենց աջակցությունը վայելող պետություններից յուրաքանչյուրը, «պարտավորվում է դիտավորյալ չձեռնարկել այնպիսի միջոցներ, որոնք ուղղակիորեն կամ անուղղակիորեն կարող են վնասել այն մշակութային կամ բնական ժառանգությանը, որը գտնվում է սույն Կոնվենցիայի մասնակից մյուս պետությունների տարածքում»:
«Գլխավոր տնօրենը հիշեցրել է նաև 2017 թվականին միաձայն ընդունված ՄԱԿ-ի Անվտանգության խորհրդի 2347 բանաձևի դրույթները, որոնք դատապարտում են մշակութային ժառանգության ոչնչացման ակտերը»,- հավելել են ՅՈՒՆԵՍԿՕ-ում: