2019 թվականն իրադարձությունների առումով բավականին հարուստ տարի էր։ Եթե տնտեսական քաղաքականության համատեքստում փորձենք առանձնացնել 2019-ի մեր ձեռքբերումները, առաջինը ի՞նչը կհիշեիք, և ինչո՞ւ․ «Առաջին լրատվական»-ի հարցին ԱԺ տնտեսական հարցերի մշտական հանձնաժողովի նախագահ Բաբկեն Թունյանը պատասխանեց․ «Քանի որ տնտեսության մասին խոսելիս այլընտրանք չկա՝ դու պետք է խոսես փաստերի հիման վրա, ինձ համար փաստերը վիճակագրական տվյալներն են։ Վիճակագրական տվյալները ցույց են տալիս, որ մեզ մոտ բավականին բարձր տնտեսական աճ է գրանցվել։ Այսինքն՝ դեռ ամբողջ ցուցանիշը չկա, բայց 7 տոկոսի շրջանակներում տնտեսական աճ է գրանցվել, որը տարածաշրջանում ամենաբարձրն է։ Մի համեմատություն ևս անեմ․ օրինակ՝ 2019 թվականի հունվար-սեպտեմբերին 1 շնչին բաժին ընկնող ՀՆԱ-ն ավելի մեծ է եղել, քան 2016 թվականի ամբողջ տարվանը։ Սա նշանակում է, որ մենք կամաց-կամաց ցածր եկամուտ ունեցող երկրների շարքից տեղափոխվում ենք ավելի միջին, հետո համոզված եմ, որ մի որոշակի փուլում նաև բարձր։
Սա մի հարց է։ Բայց մեկ այլ հարց է նաև, թե այդ եկամուտն ինչպես է բաշխվում։ Եկամտի ավելացումը չի նշանակում, որ բոլորը հավասարապես դա ստանում են․ մարդ կա ստանում է 100 դոլար, մարդ կա ստանում է 10 հազար դոլար, իսկ մարդ էլ կա, որ ընդհանրապես չի ստանում։ Շուկայական տնտեսության մեջ դա անխուսափելի է, բայց պետությունը նաև իր պարտավորությունը պետք է կատարի, որ հնարավորինս վերաբաշխման միջոցով արդարությունը վերականգնի։ Այդ առումով 2019-ի ընթացքում մենք մի քանի օրենսդրական նախաձեռնություններ ենք արել, որոնք արդեն այս տարվա սկզբից ուժի մեջ կմտնեն։ Խոսքը նվազագույն աշխատավարձների բարձրացման մասին է, կենսաթոշակների բարձրացման մասին է, որոշ հարկատեսակների նվազման մասին է, միկրոբիզնեսի ներդրման մասին է, տարբեր սոցիալական ծրագրերի մասին է»։
Մանրամասները՝ տեսանյութում։
