«2019-ի ամենաաղմկահարույց իրադարձությունը Ռոբերտ Քոչարյանի դատավարությունն էր. Ռոբերտ Քոչարյանից պրծանք, որ ամեն օր խափանման միջոց էինք փոխում, հիմա Սերժ Սարգսյանին պիտի նայենք՝ խափանման միջոց են փոխում-փոխում-փոխում»,- «Առաջին լրատվական»-ի հետ զրույցում նշեց դերասան, քաղաքական սատիրիկ Սերգեյ Դանիելյանը՝ ամփոփելով 2019 թվականը:
Նա հավելեց. «Մեկ էլ բացում է ինձ, որ ասում են՝ քաղաքական հետապնդում է. բա այ քեզ բան՝ քաղաքական հանցագործներին պիտի քաղաքական հետապնդում լինի, բա ինչակա՞ն՝ արվեստագիտակա՞ն, թե՞ ատամնաբուժական հետապնդում պիտի լինի: Եթե մարդը քաղաքական գործիչ է և արել է ազգի դեմ, հակապետական ինչ-որ քայլեր, ուրեմն քաղաքական հետապնդում պիտի լինի»:
Ինչ վերաբերում է Հայաստանի քաղաքական ներկապնակին և ընդդիմության առկայությանը, Սերգեյ Դանիելյանը նկատեց. «Խորհրդարանական ընդդիմություն չկա. «Բարգավաճ Հայաստանը» միշտ սպասարկել է նախորդ ռեժիմին ու հաջորդ ընտրություններից հետո չպիտի հայտնվի պառլամենտում, և պետք է պարոն Ծառուկյանը զբաղվի բիզնեսով, ինչը նրա մոտ շատ լավ է ստացվում: «Լուսավոր Հայաստանը» կարող է ընդդիմություն դիտարկվել: Իսկ արտախորհրդարանական ուժերից պետք է ձևավորվի ընդդիմություն, և ունենանք լրիվ նոր պառլամենտ, ոչ թե հեղափոխական մարդկանցից, ովքեր եկան փողոցից, երբ այլընտրանք չկար: Պետք է ունենանք հասուն քաղաքական գործիչներ, որոնք կպատկերացնեն, թե երկիրն ինչպես է զարգանալու»:
Դերասանի կարծիքով՝ մշակութային հեղափոխությունը, ի տարբերություն քաղաքական հեղափոխության, շատ ավելի դժվար է կատարվում. «Դա կապված է ժողովրդի բարքերի, մենթալիտետի, ճաշակի հետ, որ տարիներ շարունակ ծիլ են տվել ժողովրդի մեջ»:
Հարցազրույցն ամբողջությամբ՝ տեսանյութում: