Ավստրալիայում բռնկված հրդեհների պատճառով երկրի հարավ-արևելյան ափերը ծխով են պատվել: Արբանյակից արված վերջին լուսանկարները պատկերացում են տալիս այս բնապահպանական աղետի ծավալների մասին:
Հրդեհի ծավալներն այնպիսին են, որ Նոր Հարավային Ուելսի նահանգն արտակարգ դրություն է հայտարարել ու խոստովանել, որ որոշ փոքր քաղաքներ փաստացի կուլ են գնացել կրակին: Այդպիսի քաղաքներից է Կոնջոլան, որ տեղակայված է համանուն ազգային պարկի հարևանությամբ:
Հազարավոր ավստրալացիներ լքել են իրենց տները և ապաստանել օվկիանոսի ափին՝ սպասելով փրկարար առաքելության ժամանմանը:
Առողջարանային Մալակուտա քաղաքի բնակիչները նկատել են, որ կրակը փակել է ճանապարհներն ու բնակավայրից ելքերը: Բնակիչներն ու զբոսաշրջիկները ստիպված են փրկության ուղիներ փնտրել լողափերում, քանի որ ուժեղ ծխի պատճառով անհնար է քաղաքում մնալ:
