Իրանի «Իսլամական հեղափոխության պահապանների կորպուսի» «Ղոդս» հատուկ ստորաբաժանման ղեկավար, սպանված գեներալ Ղասեմ Սուլեյմանիի մարմինը տեղափոխել են հայրենիք։ Այս մասին հաղորդում է ISNA գործակալությունը:
Գործակալության տվյալներով՝ գեներալի մարմինը տեղափոխել են Իրանի հարավ-արևմուտքում գտնվող Ահվազ քաղաք, որտեղ անցկացվում է զոհված ռազմական առաջնորդի հրաժեշտի արարողությունը։ Իրանական IRIB հեռուստառադիոընկերությունը հրապարակել է տեսաձայնագրություն, թե ինչպես են իրանական դրոշով փաթաթված դագաղն իջեցնում ինքնաթիռից զինվորական նվագախմբի հնչյունների ներքո՝ գրում է «Ինտերֆաքսը»:
Նշվում է, որ գեներալին հրաժեշտ տալու համար Ահվազում հավաքվել են հազարավոր մարդիկ։ Քաղաքի վարչական հաստատությունները, դպրոցներն ու համալսարանները՝ պայմանավորված գեներալի հրաժեշտի արարողությամբ, փակ են։ Սգո արարողությունը տեղի կունենա նաև իրանական այլ քաղաքներում: Այնուհետև գեներալին կհուղարկավորեն Իրանի հարավարևելյան հատվածում գտնվող Քերման քաղաքում: