Լիբանանի արդարադատության նախարարի պաշտոնակատար Ալբերտ Սերհանը ճապոնական Kyodo գործակալությանը տված հարցազրույցում ասել է, որ Ճապոնիայի իշխանությունները կարող են մասնակցել Nissan ավտոկոնցեռնի նախկին ղեկավար Կառլոս Գոնի դեմ դատական գործընթացներին, բայց հիշեցրել է, որ այն կանցկացվի հանրապետության ազգային օրենսդրության համաձայն:
«Այն պայմաններում, երբ մեր և Ճապոնիայի միջև համաձայնություն չկա արտահանձնման հետ կապված հարցերի շուրջ, գործը կքննարկվի ինքնիշխան իրավունքի համատեքստում», – նշել է Սերհանը:
Լիբանանի արդարադատության նախարարի ժամանակավոր պաշտոնակատարը հավելել է նաև, որ «Ճապոնիայի իշխանությունները կարող են մասնակցել, հեշտացնել կամ վերահսկել Կառլոս Գոնի նկատմամբ դատական գործընթացները»:
Ավելի վաղ հաղորդվել էր, որ Nissan-ի նախկին ղեկավարը կարող է հարցաքննվել Լիբանանի դատախազների կողմից այն բանից հետո, երբ լիբանանյան իշխանությունները հայտարարեցին, որ իրենք ստացել են, այսպես կոչված, «կարմիր ծանուցումը» Ինտերպոլից՝ Կառլոս Գոնի նկատմամբ խուզարկություն և ժամանակավոր կալանք իրականացնելու վերաբերյալ:
Kyodo գործակալությունը նշում է, որ չնայած ճապոնացի իրավապահներին թույլատրվում է մասնակցել լիբանանյան գործընկերների գործողություններին, Գոնի դեմ դատական վարույթ հարուցելը չափազանց դժվար կլինի՝ հաշվի առնելով օրենսդրության և լեզվական խոչընդոտների տարբերությունը։