Հաշվի առնելով, որ 2019 թվականը Ազգային ժողովի առաջին տարին էր, բավական ակտիվ էր նաև նիստերի քանակի առումով, քննարկված և ընդունված նախագծերի առումով: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր, Առողջապահության և սոցիալական հարցերի հանձնաժողովի նախագահ Նարեկ Զեյնալյանը՝ ամփոփելով 2019 թվականը:
«Իհարկե, որոշակի ակտիվ քննարկումներ եղել են մեր հանձնաժողովում, բայց դա ամենևին չպետք է վերագրել ԱԺ-կառավարություն կամ ԱԺ հանձնաժողով-կառավարություն հակասությանը: Տարաձայնություններ եղել են տարբեր նախագծերի, տարբեր հոդվածների շուրջ, ինչը ես նորմալ եմ համարում: Եթե մենք խնդիր ենք տեսնում որևէ նախագծում կամ որևէ հոդվածում, դա անպայման քննարկման առարկա է դառնում հանձնաժողովում և գալիս ենք ընդհանուր հայտարարի: Կարող են որոշակի լարված լինել այդ քննարկումները»,-ընդգծեց Զեյնալյանը:
