2019 թվականը շատ հագեցած էր բուռն իրադարձություններով։ Այն ինչո՞վ նշանավորվեց ձեզ համար, ի՞նչ կարևոր իրադարձություններ են տեղի ունեցել, որոնք կցանկանայիք հիշել ու առանձնացնել․ «Առաջին լրատվական»-ի հարցին փաստաբան Նորայր Նորիկյանը պատասխանեց․ «Բնականաբար, 2019 թվականը հետհեղափոխական Հայաստանի համար մեծ սպասելիքների և այն կարևորագույն սքանավորումների տարի էր։ 2019-ը բավականին աղմկոտ էր դատավարությունների տեսանկյունից, նաև պետք է նշեմ, որ դա այն տարին էր, որ Նիկոլ Փաշինյանի գլխավորած քաղաքական իշխանությունը երկրի կառավարման համար ամբողջությամբ պատասխանատվություն կրեց։ Եվ, ըստ էության, դա այն տարին էր, որտեղ տարիներ անց Նիկոլ Փաշինյանի կառավարությունը հաշվետու պետք է լինի այդ տարվա բոլոր ձեռքբերումների կամ բացթողումների, չկատարած քայլերի համար։
Այնուամենայնիվ, հաշվի առնելով հետհեղափոխական Հայաստանում ստեղծված իրավիճակը, պետք է ասել, որ բոլորը սպասումների մեջ են։ Սպասումներ, որ մեր հանրային կյանքում՝ իրավական դաշտում, քաղաքական դաշտում, քաղաքացիական դաշտում, մեր հանրային կյանքի այլ ոլորտներում, տեղի կունենան դրական փոփոխություններ։ Ես չեմ կարող ասել, որ արդյունքները բոլորի համար գոհացուցիչ են, բայց ամենակարևորն այն էր, որ պատերազմ չեղավ, խաղաղության տարի էր, և մեր Զինված ուժերի զինծառայողները ևս մեկ տարի կարողացան ապահովել մեր երկրի խաղաղությունը։ Իմ կարծիքով՝ սա ամենակարևորն է, որովհետև մեր տարածաշրջանը գտնվում է մշտապես պատերազմի բռնկման շեմին։ Ուստի, կարծում եմ, որ, քանի դեռ խաղաղություն հաստատված չէ մեր երկրում, մենք մշտապես այդ հանգամանքը պետք է համարենք կարևորագույն ձեռքբերում»։
Մանրամասները՝ տեսանյութում։