Հայաստանում փոփոխությունների հասարակական պահանջը հասունացած էր։ Դրա համար էլ 2018 թվականին ժողովուրդը համախմբվեց, մերժեց ու փոփոխություններ իրականացրեց, որի արդյունքում ունեցանք նոր իշխանություն, որը որդեգրեց նոր գաղափարներ ու որակական նոր պետություն ունենալու ռազմավարություն։
Մենք 2020 թվական ենք թևակոխվում բավականին կնճռոտ և խնդրահարույց հարցերի բեռով։ Այն գործիքակազմը, այն մեթոդաբանությունը, որով 2019 թվականին իշխանությունը փորձում էր լուծել իրավապահ համակարգի հարցը, որքանո՞վ են, ըստ ձեզ, արդյունավետ․ «Առաջին լրատվական»-ի հարցին քաղաքագետ Էդգար Վարդանյանը պատասխանեց․ «Հիմնական գաղափարն այն է, որ այնպիսի լուծում առաջարկեն, որոնք չքննադատվեն ինչպես Արևմուտքի կողմից, այնպես էլ քաղաքացիական հասարակության կողմից, որպես հակասահմանադրական, որպես հակաժողովրդավարական, որպես ինչ-որ ինստիտուտների դեմ իրականացված ճնշումներ։ Այսինքն՝ այստեղ կառավարող ուժի մոտ կա զգուշավորություն։ Իմ կարծիքով՝ այդ զգուշավորությունը իշխանությունների մոտ փոքր-ինչ ավելին է, քան արժեր, որ լիներ։
Այսինքն՝ հնարավոր են ավելի կտրուկ լուծումներ հենց Սահմանադրության շրջանակներում՝ առանց որևէ մեկի իրավունքները ոտնահարելու։ Ճիշտ կլինի, որ փնտրտուքներ լինեն այդ ուղղությամբ, որպեսզի մարդիկ նստեն ու մտածեն՝ եթե հնարավոր է՝ ամեն ինչ սկսեն զրոյից։ Իսկ միջազգային փորձը ցույց է տալիս, որ հնարավոր է։ Այսինքն՝ որոշում կայացնողները քաղաքացիական հասարակության հետ մեկտեղ տարբեր ձևաչափերով քննարկումներ անցկացնեն, թե մենք այս անցումային փուլում ինչ պետք է անենք, որովհետև մենք տեսնում ենք, որ կա հանրային որոշակի դժգոհություն անցումային փուլի տեմպերի և նաև կոշտության առումով»։
Մանրամասները՝ տեսանյութում։