Մեծ Բրիտանիայի թագուհի Եղիսաբեթ Երկրորդի նախկին խոհարար Դարեն ՄաքԳրեյդին նշել է, որ թագավորական ընտանիքը տոներին ուտում է այն, ինչ բրիտանացիների մեծ մասը: Այնուամենայնիվ, Սուրբ Ծննդյան նախապատրաստությունները 57-ամյա խոհարարը համեմատել է «ռազմական գործողության» հետ: Խոհարարի խոսքով, որպեսզի ամեն ինչ անթերի անցնի, պահանջվում է մի քանի ամիսների նախապատրաստություն:
Այդ օրը մատուցվում է հնդկահավ՝ կարտոֆիլով կամ պյուրեով, տապակած շագանակ, բրյուսելյան կաղամբ: Իսկ որպես դեսերտ՝ թագուհին նախընտրում է ավանդական պուդինգը:
Ամբողջ մեծ ընտանիքը հավաքվում է սեղանի շուրջ՝ երեխաներից բացի: Նրանք առանձին են նստում, սակայն մենյուն նույնն է:
ՄաքԳրեյդին նաև նշել է, որ թագավորական մենյուում բացակայում է սխտորը:
Ինչ վերաբերում է Եղիսաբեթ թագուհուն, պարզվում է՝ նա հետևում է ցածր ածխաջրային սննդակարգին, ուստի թագավորական խոհարարները հազվադեպ են պատրաստում բրինձ, կարտոֆիլ և մակարոնեղեն:
Ածխաջրային փոքրիկ բացառություն են թեյախմության ժամանակ ավանդական սենդվիչները:
Խոհարարը նաև նշել է, որ թագուհին քաղցրակեր է և շատ է սիրում շոկոլադ և շոկոլադային աղանդեր: