Նոյեմբերյանի պետական քոլեջի նախկին փոխտնօրեն Անահիտ Փարսադանյանը հեղափոխությունից հետո նոր Հայաստանում վեր է հանում նախորդ իշխանությունների ժամանակ հատկապես կրթական ոլորտում տեղի ունեցած անօրինականությունները, ծանոթ-բարեկամով կրթական ոլորտից հեռու մարդկանց տնօրենների պաշտոններում նշանակելու գործընթացը և ցանկանում է հասնել արդարության:
Ամեն ինչ սկսվել է 2014 թվականից, երբ Նոյեմբերյանի պետական քոլեջի տնօրենի պաշտոնակատար է նշանակվում Արմեն Ղազարյանը, ով, Փարսադանյանի խոսքով, կրթական ոլորտից շատ հեռու մարդ է, բայց փոխարենը ազգակցական կապերով կապված է Արյունաբանական կենտրոնի նախկին տնօրեն Սմբատ Դաղբաշյանի հետ. վերջինիս հորաքրոջ որդին է: Փարսադանյանի խոսքով՝ այդ ժամանակ բոլորն էլ գիտեին, որ նա նշանակվել է այդ ժամանակ կրթության նախարար Արմեն Աշոտյանի միջնորդությամբ: Նրան պաշտոնին նշանակելուց հետո ԿԳՆ պաշտոնյա Սասուն Համբարձումյանը Ղազարյանին ներկայացնելիս շեշտում է՝ վերջինս նշանակվել է հենց իրենց հովանավորությամբ:
«Մենք նրան ընդունեցինք, մի քանի ամիս աշխատեցինք, որից հետո պարզվեց, որ նա եկել է լրիվ ուրիշ նպատակով: Նա միայն պետական միջոցներն էր բաշխում կամայականությամբ և ուրիշ ոչինչ: Եկավ մի պահ, որ այլևս հնարավոր չէր նրա հետ աշխատել, քանի որ նա որևէ առաջընթաց չէր ապահովում: Առանց կոնֆլիկտի որևէ աշխատանքային օր չէր անցնում: Ճիշտ է, ինքն իր թիմը ձևավորել էր, բայց աշխատակիցների հետ մշտապես խնդիրներ էին առաջանում: Եվ քանի որ 2015-ից հետո քոլեջների տնօրենները պետք է դպրոցի տնօրենների պես ընտրվեին՝ հավաստագրման միջոցով, ԺՊ նշանակվելուց երեք ամիս անց շատ արագ հայտարարվեց քոլեջի տնօրենի մրցույթ: Ես մասնակցեցի, իմ փաստաթղթերը ներկայացրեցի: Մրցույթը եղավ օրենքի խախտումներով: Մասնակցում էինք ես և նա: Հենց առաջին գրավոր փուլից Արմեն Ղազարյանը կտրվեց և դուրս մնաց: Ես գրավոր և բանավոր փուլն էլ անցա, և պետք է հայտարարեին, որ ես եմ ընտրվել, պարզվեց, որ չեմ ընտրվել, երկու ձայն է պակասել: Բայց այդ ամբողջ ընթացքում տնօրենի պաշտոնակատարը միջանցքում էր, ինչ-որ զանգեր էր անում: Այդպես էլ մնաց ամեն ինչ: Ես բողոքեցի, պետք է նոր մրցույթ լիներ, բայց այդպես էլ չկայացավ նոր մրցույթը: Հետո խնդիրները սկսվեցին, ինձ աշխատանքից հեռացրեցին: Նա իր նպատակին հասնելու համար ինձ ու էլի մի քանի առողջ մտածողություն ունեցող մասնագետի պարզապես հեռացրեց աշխատանքից»,- պատմեց Փարսադանյանը՝ հավելելով, որ հետագայում արդեն Ղազարյանի աշխատաոճում քրեական էլեմենտներ հայտնվեցին, ոստիկանության 6-րդ վարչությունը սկսեց քննել դիզվառելիքի չարաշահման դեպք, սակայն դա էլ է կոծկվում, և քրգործը փակվում է:
Նշենք, որ ոստիկանության կողմից հիշյալ քրեական գործը հարուցվել էր 2017 թվականին: Այդ ժամանակ ՀՀ ոստիկանության մամուլի ծառայությունը տեղեկացրեց, որ հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչության աշխատակիցները ստացված օպերատիվ տեղեկությունների հետևողական ուսումնասիրման արդյունքում բացահայտել են պաշտոնեական դիրքն օգտագործելով խոշոր չափի գումարի յուրացման և պաշտոնեական կեղծիքի դեպք: Ըստ այդմ՝ ոստիկանները պարզել էին, որ «Նոյեմբերյանի պետական քոլեջ» ՊՈԱԿ-ի տնօրեն Արմեն Ղազարյանը 2014-ից մինչև 2017 թվականն ընկած ժամանակահատվածում, քոլեջի դասասենյակները ջեռուցելու պատրվակով, պաշտոնեական դիրքն օգտագործելով՝ վառելիքի գնման պայմանագրեր է կնքել մատակարար ընկերության հետ: Մատակարարից գնվել է շուրջ 3.000.000 դրամի 8 172 լիտր դիզելային վառելիք, բայց դասասենյակները ջեռուցվել են վառելափայտով։ Արմեն Ղազարյանը փայտամթերքի համար վճարել է շուրջ 1.000.000 դրամ կամ գումարի փոխարեն՝ փոխանակման կարգով հատկացրել է վառելիքի կտրոններ, իսկ մնացած՝ իրեն վստահված շուրջ 2.000.000-ի դիզելային վառելիքը յուրացման եղանակով հափշտակել է: Ըստ ոստիկանության՝ այդ տարիների ընթացքում ձեռք բերված վառելիքի օգտագործում ցույց տալու համար Արմեն Ղազարյանը կազմել է վառելիքի ելքի կեղծ ապրանքագրեր և բաշխման գրաֆիկներ: Սակայն, ինչպես նշեց Փարսադանյանը, այս քրեական գործը ևս կարճվում է և մնում անհետևանք:
«Նրա համար ճանապարհ էր հարթվում ամենուր: Հովանավորությունը մեծ դերակատարություն ուներ: Եթե այդպես չլիներ, նա առանց մեկ տարվա ստաժի չէր կարող տնօրեն դառնալ: Օրենքն ասում է, որ տնօրենի մրցույթին կարող է մասնակցել այն անձը, ով մանկավարժական գործունեության վերջին 10 տարվա մեջ առնվազն 5 տարվա մասնագիտական ստաժ ունի: Իսկ նա, չունենալով համապատասխան աշխատանքային կենսագրություն, կարողացավ մասնակցել շինծու մրցույթի ու դառնալ տնօրեն: Իսկ եթե ստաժ է ներկայացվել թղթերով, ապա դա կեղծված է: Մենք նույն համայնքից ենք, ես նրան շատ լավ ճանաչում եմ: Ստաժի վերաբերյալ փաստաթղթերի կեղծիքն արվել էր համայնքապետարանում, որը հաստատվել էր մարզպետարանում: Այլ կերպ ասած՝ նրա միակ առավելությունը Սմբատ Դաղբաշյանի ազգական լինելն էր, իսկ Սմբատ Դաղբաշյանի ու Սերժ Սարգսյանի տիկնոջ՝ Ռիտա Սարգսյանի մտերմության մասին բոլորը գիտեն: Այդ տարիներին մանկապարտեզների տնօրենների, քոլեջների տնօրենների պաշտոնները բարեկամներին նվերներ անելու, նրանց լավություն անելու միջոց էին դարձել: Իսկ կոնկրետ այս քոլեջի դեպքում այդ հանցագործությունը արվեց Արմեն Աշոտյանի ձեռքով ու նրա հովանավորությամբ: Այս կեղծիքների մասին ես տեղյակ եմ պահել նաև Աշոտյանին, հաջորդ նախարար Լևոն Մկրտչյանին, ներկայացրել ամեն ինչ, բայց ոչ մի արդյունք»,- ասաց Փարսադանյանը՝ հավելելով, որ թեև ինքը ներկայումս քոլեջում չէ, արժանապատիվ կերպով բանվորություն է անում և վաստակում իր օրվա հացը, բայց սկզբունքորեն պայքարելու է մինչև վերջ, որպեսզի արդարությունը հաստատվի:
«Առ այսօր քոլեջը կառավարվում է սեփական տան սկզբունքով, լճացում է: Իսկ հիմա, քանի որ երկրում փոփոխություն է եղել, ես կուզենայի, որ այդ հանցագործությունը բացահայտվի: Ես պաշտոնի կռիվ չեմ տալիս, ես հիմա ուրիշ տեղ եմ աշխատում, բայց եթե սա նոր Հայաստանն է, ապա պետք է այս հանցագործությունը բացահայտվի ու պարզվի, թե ովքեր են փաստաթղթեր կեղծել, ովքեր են օրենքը շրջանցել և ինչի համար: Ես նախկինում շատ եմ բողոքել, բայց բոլոր բողոքներից հետո հարուցված քրեական գործերը կարճվում էին: Անգամ անցած տարի սեպտեմբերին ես կրկին խնդիրը բարձրացրեցի, բայց մամուլից տեղեկացա, որ գործը կրկին կարճվել է իբրև թե հանցակազմի բացակայության պատճառով: Արդյունքում այդ անձը առ այսօր քոլեջում տնօրեն է աշխատում»,- եզրափակեց Անահիտ Փարսադանյանը:
