«Հոկտեմբերի 27-ի գործի վերաբացման պահանջը կապված չէ հեղափոխության հետ. հոկտեմբերի 27-ից սկսած՝ մինչև այսօր էլ այդ խնդիրը դրված է եղել, կասկածները միշտ էլ եղել են, և գործը վերաբացելու, ուսումնասիրելու, վերջակետ դնելու պահանջները միշտ են հնչել»,- «Առաջին լրատվական»-ի հետ զրույցում նկատեց իրավապաշտպան Վարդան Հարությունյանը՝ անդրադառնալով Հոկտեմբերի 27-ի ահաբեկչության կազմակերպիչների և հովանավորների մասով գործի վերաբացմանը:
Նա ընդգծեց՝ ցանկացած հանցագործություն պետք է ավարտվի բացահայտմամբ. «Լիարժեք, համակողմանի բացահայտումն է միայն վերջակետ դնում և փակում բոլոր տեսակի կասկածներն ու խոսակցությունները: Իսկ երկրի ճակատագրի վրա ազդեցություն ունեցող այնպիսի հանցագործություն, ինչպիսին հոկտեմբերի 27-ի տեռորիստական ակտն էր, առավել ևս. այդ գործում պետք է մութ անկյուններ չմնան, կամ եթե լինելու են այդ մութ անկյունները, գոնե քիչ լինեն: Այստեղ այդ մութ անկյունները շատ են»:
Մեր զրուցակիցը հույս հայտնեց, որ այս ընթացքը դրական կլինի, և կդրվեն վերջակետեր:
Անդրադառնալով այն հարցին, որ Հոկտեմբերի 27-ի գործից անջատված մասով գործի քննությունը հանձնվել է ԱԱԾ-ին, Վարդան Հարությունյանը նշեց. «Այս հարցում մարդկանց մեջ եղած կասկածը անտեղի չէ, որովհետև սա այն նույն Ազգային անվտանգության ծառայությունն է, որը էր»:
Իրավապաշտպանի խոսքով՝ Հոկտեմբերի 27-ի գործը կարելի է բաժանել 2 փուլի. «Փուլ առաջին՝ երբ Ռոբերտ Քոչարյանը թույլ էր, չուներ հենարան, և փուլ երկրորդ՝ երբ Ռոբերտ Քոչարյանը ուժեղացավ: Առաջին փուլում ցուցմունքներ կային մի տիպի՝ տրված Նաիրի Հունանյանի և մյուսների կողմից, և երկրորդ փուլում, երբ Ռոբերտ Քոչարյանը հզորացավ, ամրապնդեց իր դիրքերը, այդ ցուցմունք տվող մարդիկ շատ արագ փոխեցին իրենց ցուցմունքները, ինչը մեծ կասկածներ է առաջացնում»:
Վարդան Հարությունյանը նշեց, որ իր բոլոր տարիների և բոլոր ժամանակների, այդ թվում նաև Հոկտեմբերի 27-ից անմիջապես հետո տեղի ունեցած առնչություններից որևէ մեկը կասկածներ չի փարատել. «Ընդհակառակը՝ բոլոր առնչությունները նոր կասկածներ են առաջացրել»:
Հարցազրույցն ամբողջությամբ՝ տեսանյութում:
