Դեկտեմբերի 11-ին, ընտրվելով Պոլսի Հայոց պատրիարք, Սահակ եպիսկոպոս Մաշալյանը հայտարարեց, որ պատրիարքարանը նոր կազմով, նոր ծրագրերով ու նախաձեռնություններով նոր համայնք կկերտի, քանի որ նորության կարիք կա՝ հոգեպես ու մտքով․»Մեր հաստատությունները նորոգվելու կարիք ունեն, իմ ընտրությունն առաջին քայլը պետք է լինի: Այսօր պատրիարք չընտրեցիք, աստծո և ազգի առաջին ծառա ընտրեցիք»,-հայտարարեց նորընտիր պատրիարքը համայնքի ներկայացուցիչների և հոգևորականների հետ հանդիպմանը։
Պատրիարքական երդման, գահակալության մեծ արարողությունը տեղի է ունենալու հունվարի 11-ին։ «Ակոս» շաբաթաթերթի հայկական բաժնի խմբագիր Բագրատ Էստուկյանն «Առաջին լրատվական»-ի հետ զրույցում նշեց, որ հատուկ ակնկալիքներ չունի նոր պատրիարքից․«Գահակալության արարողությունից հետո հիմա համայնքային հասատատությունների ընտրությունների խնդիրների հարցը կլուծվի, համայնքային ծխական խորհուրդների»,-ասաց նա։ Էստուկյանի խոսքով՝ դեռ վաղ է գնահատել պատրիարքի աշխատանքը, ժամանակ է պետք։
ԱՄՆ Սենատում Հայոց ցեղասպանության բանաձևի ընդունումից հետո Սահակ եպիսկոպոս Մաշալյանը նշել է, որ ԱՄՆ-ն հարցն օգտագործում է Թուրքիայի վրա ճնշում գործադրելու համար, բարոյական չէ:Բագրատ Էստուկյանը նկատեց, որ այսպիսի հայտարարությունների դեմ համայնքն ընդվզում է, ազգի արժանապատվությունը պետք չէ վիրավորել Թուրքիայի իշխանությանը հաճոյանալու համար։
Գաղտնիք չէ, որ Արամ սրբազան Աթեշյանը շատ սերտ հարաբերություններ ուներ իշխանության հետ, Սահակ եպիսկոպոս Մաշալյանը դեռ այդ հարաբերությունները չի հաստատել Թուրքիայի իշխանությունների հետ․ «Որոշ ժամանակ անց պետք է լինի, մեկ օրում լինող խնդիր չի»,-հավելեց նա։ Համայնքը, նրա խոսքով, գոնե ուրախ է, որ Արամ Աթեշյանը չընտրվել․ «Իհարկե, նախընտրելին արդար ընտրություններ կայացնելն էր, որ բոլոր հոգևորականները մասնակցեին, բայց դա տեղի չունեցավ։ Այնուամենայնիվ, այս դեպքում Մաշելյանն ավելի նախընտրելի է դառնում»,-նկատեց Էստուկյանը։
Նա հավելեց, որ Արամ Աթեշյանը պատրիարքի ընտրություններից հետո մեկուսացել է, թեև նրա համար ընտրության արդյունքներն անակնկալ չէր, սպասում էր այդպիսի արդյունքների։
