«Թավշյա հեղափոխության երկրորդ տարին ենք ավարտում։ Որոշ բարելավումներ, բարեփոխումներ եղան, կոռուպցիայի դեմ պայքարում էական առաջընթաց գրանցվեց, բայց հեղափոխական ուժից սպասելիքներ շատ կան։ Ե՛վ Սփյուռքը, և՛ հայաստանյան ժողովուրդը մեծ սպասելիքներ ունի նոր կառավարությունից, որոնք դեռ չեն իրագործվել»,- «Առաջին լրատվական»-ի հետ զրույցում ամփոփելով 2019 թվականը՝ ասաց «Կալիֆոռնիա Կուրիեր» թերթի հրատարակիչ և խմբագիր Հարութ Սասունյանը։
Նրա խոսքերով՝ նոր կառավարությունը պետք է արագացնի բարեփոխումները, որ ժողովուրդը մեկ անգամ ևս չհուսախաբվի, չհիասթափվի։ «Իսկ ժողովրդի հիմնական սպասելիքները կապված են տնտեսության հետ։ Ժողովուրդն իր կյանքում, իր առօրյայում պետք է փոփոխություն տեսնի, նոր աշխատատեղեր բացվեն, մարդկանց եկամուտները ավելանան, աշխատավարձերը բարձրացվեն։ Հեղափոխությունից հետո խանդավառությունը մեծ է, և ժողովուրդը հավիտյան չի կարող սպասել։ Խոստումները, որոնք խանդավառեցին մարդկանց, պետք է իրականություն դառնան թեկուզ որոշ չափով։ Արդեն հեղափոխության երկրորդ տարին է ավարտվում, չի կարելի երկար ժամանակ ժողովրդին խոստումներով ու հույսերով պահել։ Կոնկրետ գործողությունների ժամանակ է եկել, և սկսվող տարին պետք է հենց այդ կոնկրետ գործողությունների ժամանակը դառնա»,- ընդգծեց Սասունյանը։
Մեր զրուցակիցը 2019-ում կարևոր ձեռքբերում է համարում ԱՄՆ ներկայացուցիչների պալատի կողմից ցեղասպանության բանաձևի ընդունումը, թեև նշում է, որ ցեղասպանությունը երկար տարիներ ի վեր ճանաչվել է ԱՄՆ կառավարության կողմից.«ԱՄՆ կառավարության կողմից նույնիսկ մի քանի անգամ է ճանաչվել ցեղասպանությունը, պարզապես մեր ժողովուրդն անտեղյակ է դրանից։ Հերթական անդամ, երբ իմացան, որ ԱՄՆ կոնգրեսը ճանաչել է ցեղասպանությունը, չափազանց խանդավառվեցին՝ չիմանալով, որ 1975-ից ի վեր, սա արդեն երրորդ ճանաչումն է։ Հակառակ դրան, ես ուրախ եմ, որ այդ ճանաչումը եղավ, այն խանդավառություն է առաջացնում մեր ժողովրդի մոտ և մեր երիտասարդները իրենց նվիրում են հայ դատի աշխատանքներին ավելի ոգևորված ձևով։ Մեր ժողովուրդը պետք ունի կոնկրետ արդյունքների, կոնկրետ հաղթանակների։ Չի կարելի տասնամյակներ շարունակել առանց արդյունք ցույց տալու»,-ընդգծեց Սասունյանը։
Նշենք, որ դեկտեմբերի 12-ին արդեն ԱՄՆ սենատի կողմից առանց վերապահումների ընդունվեց Հայոց ցեղասպանության ճանաչման բանաձևը, որը, Սասունյանը համարում է անցնող տարում ամենամեծ հաջողությունը.«Ամերիկյան սենատը երբեք չէր ճանաչել հայոց ցեղասպանությունը։ Շատ կարևոր էր Սենատի կողմից ճանաչումը։ ԱՄՆ սենատի կողմից ցեղասպանության ճանաչումը այս տարվա ամենամեծ հաջողությունն է»,-եզրափակեց Սասունյանը։
Նշենք, որ անցնող տարում ԱՄՆ սենատում երեք անգամ վետո կիրառվեց ցեղասպանության բանաձևը օրակարգ բերելու հարցով։ Սակայն դեկտեմբերի 12-ին պատկերը փոխվեց։ «ԱՄՆ Սենատի 150 բանաձեւը արդարության եւ ճշմարտության հաղթանակն է։ Ամբողջ աշխարհի հայ ժողովրդի անունից ես խորը երախտագիտություն եմ հայտնում Սենատին այս նշանակալի օրենքի համար։ Սա հիշատակի տուրք է 20-րդ դարի առաջին ցեղասպանության 1,5 միլիոն զոհերին եւ համարձակ քայլ ցեղասպանության կանխման ծրագրի առաջընթացում։ #Այլեւս երբե՛ք»,- սենատի կողմից բանաձևի ընդունումից հետո գրել էր վարչապետը Նիկոլ Փաշինյանը։
