Ազգային ժողովի գնահատական հնչեցնել չէի ցանկանա, որովհետև գնահատականն արդյունքներով քաղաքացիները կամ մամուլը կհնչեցնեն։ Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության ղեկավար Լիլիթ Մակունցը՝ ամփոփելով 2019 թվականը։
«Բայց ես կարծում եմ, որ մենք բավականին կառուցողական և շատ ինտենսիվ ենք աշխատել։ Ովքեր հնարավորություն են ունեցել հետևելու ԱԺ հանձնաժողովների աշխատանքին, պետք է նկատած լինեն, թե ինչպիսի եռանդով, ինչպիսի մասնագիտական ներգրավվածությամբ են եղել այդ աշխատանքները»,-ասաց Մակունցը։
Անդրադառնալով նոր խորհրդարանի պատրաստված չլինելու մասին մեղադրանքներին, նա ասաց.«Այս խորհրդարանում ընտրվել են մարդիկ, որոնք առաջին անգամ են խորհրդարանում և նրանց թիվը հասնում է մոտ 100-ի։ Բնական է, որ որոշակի կարողությունների զարգացման, որոշակի հմտությունների ձեռքբերման ժամանակ պահանջվել է, որը լրացվել է մասնավորապես «Իմ քայլը» խմբակցության պարագայում, առանձին դասընթացների կազմակերպման միջոցով։ Մենք դրանից երբեք չենք խորշել և արել ենք հաճույքով»,-ընդգծեց Մակունցը։