Կենդանաբանական այգին հասարակական վայր է, որտեղ պահպանվում և ցուցադրվում են աշխարհում գոյություն ունեցող և ոչնչացման եզրին գտնվող ամենատարբեր տեսակի կենդանիներ:
Երևանի կենդանաբանական այգին 69 տարի է, ինչ իր դռներն է բացում բոլոր այցելուների, զբոսաշրջիկների և, իհարկե, այգու ամենասիրելի և անդավաճան փոքրիկների առջև: Այգին իր 223 տեսակ կենդանիներով միշտ պատրաստ է զարմացնել իր այցելուներին: Չնայած նրան, որ ձմռան ամիսներին այցելուների թիվը պակասում է, այնուամենայնիվ, այգու տնօրինությունը և աշխատակազմը մեծ նվիրվածությամբ աշխատում են ամեն օր: «Կենդանաբանական այգիների առաջնահերթ ծրագիրը կենդանիների համալրման, այգու կյանքը երկարացնելու ծրագիրն է»,- իր խոսքում նշեց այգու տնօրեն Սահակ Աբովյանը:
«Այգին այսօր խոշոր ներդրումների կարիք ունի: Քաղաքապետարանը և անձամբ քաղաքապետը մեծ ուշադրություն են դարձնում այգուն: Այս պահին այգին շատ կարիքներ ունի հոգալու.հիմնովին պետք է վերանորոգվի, ազատավանդակները չեն համապատասխանում միջազգային նորմերին: Սննդի հետ կապված խնդիրներ այս տարի չի առաջացել, չնայած սննդամթերքի գների աճին: Ջեռուցումը այգում կատարվում է էլեկտրական տեների միջոցով, որը շատ թանկ է նստում մեզ վրա: Լավ կլինի, որ կենտրոնական ջեռուցում լինի: Ջրլող թռչյունների համար հատուկ չսառչող լողավազաններ ունենք, մյուս ազատավանդակներն էլ աշխատում ենք տաք պահել: Կենդանաբանական այգին միջոցառումների պլան ունի, ըստ որի` տարվա սկզբում պլանավորում ենք, թե ինչ պրոֆիլակտիկ աշխատանքներ պետք է արվեն: Այգու հետագա ծրագրերի մեջ է մտնում նաև այգուն կից քոլեջ ստեղծելը, որտեղ կդասավանդվի վայրի բնություն, վայրի կենդանիներ, դրանց խնամքն ու պահպանումը: Մասնագետների կարիք շատ ունենք»,- ցավով նշեց պարոն Աբովյանը:
Կենդանաբանական այգին 2011 թվականին կտոնի իր 70-ամյակը:
«Եթե միջոցներ հայթայթվեն, ապա անպայման կտոնենք, հյուրեր կգան, գիտական կոնֆերանս կանցկացվի»,- ավելացրեց այգու տնօրենը:
Այգու տնօրինությունը պայմանավորվածություն ունի Դուշանբեի կենդանաբանական այգու տնօրենի հետ կենդանիներ փոխանակելու վերաբերյալ:
«Հույս ունենք, որ այս տարի մեր այգին կհամալրվի Դուշանբեից բերված հովազներով»,- խոսքն ավարտեց պարոն Աբովյանը:
