ՌԴ նախագահ Վլադիմիր Պուտինը սրիկա և հակասեմիտ խոզ է անվանել Երրորդ ռայխում Լեհաստանի դեսպան Յուզեֆ Լիպսկիին, որը խոստացել էր կանգնեցնել Ադոլֆ Հիտլերի հուշարձանը՝ հրեաներին Աֆրիկա վտարելու համար: Այդ մասին հայտնում է TASS-ը:
«Սրիկա: Հակասեմիտ խոզ: Այլ կերպ անհնար է բնորոշել»,- հայտարարել է Պուտինը Ռուսաստանի պաշտպանության նախարարության կոլեգիայի նիստում Երկրորդ աշխարհամարտի բռնկման թեման քննարկելիս:
Ռուսաստանի ղեկավարը Լիպսկու հայտարարության մասին ավելի վաղ խոսել էր դեկտեմբերի 20-ին Եվրասիական բարձրագույն տնտեսական խորհրդի նիստում, որին մասնակցում էին ՀՀ վարչապետ Նիկոլ Փաշինյանը, Բելառուսի նախագահ Ալեքսանդր Լուկաշենկոն, Ղազախստանի առաջին նախագահ Նուրսուլթան Նազարբաևը, Ղրղզստանի նախագահ Սոորոնբայ Ժեենբեկովը, ինչպես նաև Մոլդովայի նախագահ Իգոր Դոդոնը: Այն ժամանակ Պուտինը ԱՊՀ երկրների ղեկավարների համար դասախոսություն է կարդացել Մյունխենի պայմանագրի, Չեխոսլովակիայի բաժանման և Լեհաստանի դերի մասին Երկրորդ աշխարհամարտի սկզբում:
