Մի շարք երկրների ղեկավարներ դադարեցնում են իրենց աշխատանքը և պատրաստվում են Սուրբ ծնունդը դիմավորել իրենց մերձավորների ու հարազատների շրջանակում՝ տեղեկացնում է interfax-ը:
ԱՄՆ նախագահ Դոնալդ Թրամփն իր տիկնոջ հետ Ֆլորիդայի Փալմ-Բիչի Մար-ա-Լագոյի իր նստավայր է մեկնել դեռևս անցած շաբաթվա վերջին: Իր գոլֆ-առողջարանում ԱՄՆ ղեկավարն անցած հանգստյան օրերին խաղացել է ամերիկացի հայտնի ռադիոհաղորդավար Ռաշ Լիմբոյի, ինչպես նաև պրոֆեսիոնալ գոլֆիստ Ջեյմս Հերմանի հետ:
Սպասվում է, որ դեկտեմբերի 24-ին ավելի ուշ Թրամփը տեսակապով կմասնակցի ամերիկացի զինծառայողների մասնակցությամբ ասուլիսին:
Բրիտանական թագավորական ընտանիքը սուրբծննդյան տոների կապակցությամբ մեկնել է Նորֆոլքի Սանդրինհեմյան պալատ: Եղիսաբեթ Երկրորդ թագուհին և նրա ընտանիքի անդամները ճրագալույցին ավանդաբար ճաշկերույթ են կազմակերպում մոմերի լույսի ներքո, իսկ արդեն Սուրբ Ծնունդին մասնակցում են հանդիսավոր ժամերգությանը: Բրիտանացիները դեկտեմբերի 25-ին նաև կկարողանան դիտել թագուհու տոնական տեսաուղերձը:
Մեծ Բրիտանիայի վարչապետ Բորիս Ջոնսոնը, ինչպես հաղորդում են բրիտանական ԶԼՄ-ները, տոներին իր զուգընկերուհու՝ Քերի Սիմոնդսի հետ կուղևորվի Կարիբյան ծովի Մյուստիք կղզի:
Շվեդիայի թագավորական ընտանիքում ընդունված է միասին հավաքվել Դրոտհինգհոլնի պալատում՝ սուրբծննդյան ճաշկերույթի: Ամեն տարի Կառլ 16-րդ Գուստավ թագավորի ընտանիքի անդամները պատրաստում են տեսահոլովակներ, որտեղ նրանք զբաղվում են սուրբծննդյան տարբեր գործերով, օրինակ՝ պատրաստում են թխվածք, տոնական զարդարանքներ են պատրաստում իրենց ձեռքով կամ սահնակ են քշում:
Մոնակոյում Ալբեր Երկրորդ իշխանն իր ընտանիքի հետ ամեն տարի կազմակերպում է ընդունելություն, որին հրավիրում են հինգից 12 տարեկան 600-ից ավելի երեխաների: Երեխաներին բաժանում են նվերներ, նրանց համար ցուցադրում են ներկայացում, իսկ հետո գալիս է Սանտա Կլաուսը:
Իսպանիայի թագավորական ընտանիքը Սուրբ Ծնունդի նախօրյակին հանդես կգա երկրի բնակիչներին հասցեագրված ավանդական ուղերձով: Սարսուելա պալատում կանցկացվի հանդիսավոր ճաշկերույթ:
Բելգիայի Ֆիլիպ թագավորը և Մաթիլդա թագուհին երեխաների հետ մկայցելեն Թագավորական պալատ՝ սուրբծննդյան երգերի համերգին:
Մինչդեռ Ֆրանսիայում շարունակվող բողոքների և արհմիությունների գործադուլների ֆոնին Ֆրանսիայի նախագահ Էմանուել Մակրոնի ու նրա տիկնոջ՝ Բրիջիթի սուրբծննդյան ծագրերի մասին չի հաղորդվում: Ֆրանսիական ԶԼՄ-ների կանխատեսումներով՝ տոնական օրերին երկրում տրանսպորտը կաշխատի ընդհատումներով: Կենսաթոշակային բարեփոխման դեմ բողոքների մասնակիցներն ավելի վաղ հայտարարել են, որ մտադիր չեն դադարեցնել իրենց ակցիաները տոնի ընթացքում: