Ադրբեջանի գլխավոր քրեական հեղինակություն Նադիր Սալիֆովի (Գուլի) եղբորորդուն՝ Մագա Ռուսթավսկիին դանակահարել են ծեծկռտուքի ժամանակ Ստամբուլի ռեստորաններից մեկում, հաղորդում է «Prime Crime» լրատվական գործակալությունը:
Գործակալության տվյալներով, օրենքով գող Գուրամ Չիխլաձեն (Կվեժովիչ) 15-20 հոգու ուղեկցությամբ եկել է թուրքական ռեստորան, որտեղ Ռուսթավսկին հանգստանում էր ընկերների հետ: Նա կանչել է Ռուսթավսկուն և հարցրել, արդյոք ցանկանում է օրենքով գող դառնալ: Մագան դրական պատասխան է տվել: Այնուհետև Չիխլաձեն հարցրել է, եթե այդպես է, ապա ինչու չի միջամտել, երբ իրեն (Չիխլաձեին) ծեծի են ենթարկել Նադիր Սալիֆովի հետ առաջին հանդիպման ժամանակ:
Չիխլաձեն նշել է, որ իրեն, օրենքով գողին, ծեծի է ենթարկվել «ֆրայերը» (քրեական հիերարխիայում ավելի ցածր պաշտոն զբաղեցնող անձ): Մագա Ռուսթավսկին կտրուկ է պատասխանել Չիխլաձեի հարցերին, ինչից հետո օրենքով գողը բռուցքներով հարձակվել է նրա վրա: Ծեծկռտուք է սկսվել, որի ընթացքում Չիխլաձեի կողմնակիցներից մեկը դանակահարել է Ռուսթավսկուն:
Տուժածը հոսպիտալացվել է, թեև վերքը վտանգավոր չի եղել: Հակամարտության մասնակիցներին փնտրում է թուրքական ոստիկանությունը: Ըստ Prime Crime-ի, Չիխլաձեն իր գործողություններով կարող է հարուցել գողական համայնքի զայրույթը, իսկ Մագա Ռուսթավսկուն դանակահարողի ճակատագիրը «միանշանակ կանխորոշված է»:
Գործակալության աղբյուրի համաձայն, Մագի Ռուսթավսկու և, առավել ևս, Նադիր Սալիֆովի շրջապատում շատ են մարդիկ, որոնք պատրաստ են ֆիզիկապես վերացնել ինչպես Չիխլաձեին, այնպես էլ Ռուսթավսկուն դանակահարողին: Դրա հավանականությունը մեծանում է՝ հաշվի առնելով այն հանգամանքը, որ գողական հավաքներից մեկի ժամանակ Չիխլաձեն զրկվել է գողի կոչումից, ինչը նրան զրկում է ցանկացած տեսակի անձեռնմխելիությունից: