Այսօր Հայաստանի Հանրապետության վարչապետ Նիկոլ Փաշինյանի և Արցախի Հանրապետության նախագահ Բակո Սահակյանի համանախագահությամբ Երևանում տեղի է ունեցել Հայաստանի և Արցախի Անվտանգության խորհուրդների համատեղ նիստը: Նիստին ներկա էին նաև Հայաստանի նախագահ Արմեն Սարգսյանը: Այս նիստը 2019թ. ընթացքում երկրորդն էր, և ընդհանրապես երկրորդն էր, որպես գործնական ձևաչափ: Առաջին նիստը տեղի է ունեցել մարտի 12-ին Ստեփանակերտում:
Այսօր նաև տեղի է ունեցել ՀՖՖ անդամների արտահերթ ժողովը. Հայաստանի ֆուտբոլի ֆեդերացիայի նախագահ է ընտրվել Արմեն Մելիքբեկյանը:
Այս երկու իրադարձությունների շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր, ՀՖՖ գործկոմի անդամ Արեն Մկրտչյանը, վերլուծաբան Մհեր Ղալեչյանը և քաղաքագետ Արմեն Վարդանյանը:
Արեն Մկրտչյանի հավաստմամբ՝ ՀՖՖ գործկոմի նիստը բավականին թեժ է անցել. «Բավականին սուր պայքար էր ծավալվել: Այն, որ ՀՖՖ նախագահի ընտրություններն անցան թեժ մթնոլորտում, դա դրական է, քանի որ կար պայքար, սա աննախադեպ էր, նախկինում մեկ անձ տարիներ շարունակ զավթում էր ՀՖՖ նախագահի աթոռը և գործնականում միապետություն էր տիրում թե՛ ՀՖՖ-ում, թե՛ հայկական ֆուտբոլում: Լարված պայքար էր, բայց թեկնածուներից ոչ մեկը կարմիր գծեր չհատեց»:
Արմեն Վարդանյանի դիտարկմամբ՝ ՀՖՖ նախագահի պաշտոնը չափազանց կարևորելու արատավոր պրակտիկան որդեգրվել է վաղուց՝ սկսած Վազգեն Սարգսյանի մերձավորի՝ Սուրեն Աբրահամյանի պաշտոնավարման շրջանից: «Իշխանությունները նախկինում փորձել են ներքաշվել ֆուտբոլային գործերի մեջ, ինչն անթույլատրելի է: Այս անգամ վերջապես տեղի ունեցավ ընտրություն»,- նշեց քաղաքագետը: Արեն Մկրտչյանը հավելեց, որ գործող իշխանությունը ֆուտբոլն իրենով անելու և այն քաղաքականացնելու մտադրություն չունի. «Մենք որևէ բանի հաշվին վարկանիշ ձեռք բերելու խնդիր չունենք»:
Անդրադառնալով Հայաստանի և Արցախի Անվտանգության խորհուրդների Երևանում կայացած համատեղ նիստին, Մհեր Ղալեչյանը նշեց, որ այսպիսի համատեղ նիստեր անցկացնելը կարևոր է և անհրաժեշտ Հայաստանի և Արցախի համար:
Արմեն Վարդանյանի դիտարկմամբ՝ Հայաստանի իշխանությունները Արցախի խնդրի կարգավորման սկզբունքների հստակեցման խնդիր են առաջ քաշում: «Մադրիդյան սկզբունքներից հրաժարվելու փաստ առայժմ չկա»,- նշեց քաղաքագետը՝ հավելելով, որ Հայաստանը ձևաչափի հարցն է դնում սեղանին և առաջ է քաշում բանակցություններին Արցախի մասնակցության հարցը:
Մանրամասն տեսանյութում: