Հայաստանի ֆուտբոլի ֆեդերացիայի նախագահի թեկնածու Թովմաս Գրիգորյանն անդրադարձավ ՀՖՖ նախագահի ընտրության արդյունքների բողոքարկման հնարավորությանը։
«Արդյունքներն այս պահին չեմ գնահատի: Բողոքարկման հետ կապված որոշումը կկայացնեմ վաղը: Որոշում պետք է կայացնեմ առանց էմոցիաների»,- լրագրողների հետ զրույցում ասաց Գրիգորյանը:
Նա ՀՖՖ նախագահի ընտրությունը որակեց աննախադեպ, քանի որ ընտրությանը մասնակցում էին երկու թեկնածու, և կար մրցապայքար, որը, ըստ թեկնածուի, անհավասար էր: «Մելիքբեկյանն աջակցություն ուներ և օգտվում էր ՀՖՖ ռեսուրսներից: Անկախ ամեն ինչից, ես շարունակելու եմ ֆուտբոլի զարգացմանն ուղղված իմ գործունեությունը: Ես շնորհավորել եմ Արմեն Մելիքբեկյանին, իսկ համագործակցության մասին ոչինչ ասել չեմ կարող: 2 ԿՀ-ների՝ «Արնարի» և «Հայկական ֆուտբոլի զարգացման հիմնադրամի» լիազորությունների կասեցումը խայտառակություն էր: Անընդունելի էր այդպիսի որոշում կայացնելը: Ռուբեն Հայրապետյանի աջակցությունը, միանշանակ, ազդեց հանրության մտածողության վրա: Ես հոգնել եմ կեղծ, շինծու օրակարգերից:»,-շեշտեց Գրիգորյանը:
