Ֆրանսիայի նախագահ Էմանուել Մակրոնը հրաժարվել է նախագահության ժամկետի ավարտից հետո իրեն հասանելիք կենսաթոշակից, ինչպես նաև Սահմանադրական խորհրդում երաշխավորված ցմահ պաշտոնից: Այս մասին գրում է ֆրանսիական Le Parisien պարբերականը՝ հղում անելով Ելիսեյան պալատի ներկայացուցչին:
Պարբերականը պարզել է, որ Մակրոնն այդ որոշումը կայացրել է դեկտեմբերի 21-ին՝ Կոտ դ’Իվուար այցի ընթացքում, իր վարչակազմի աշխատակիցների հետ երկար հեռախոսազրույցից հետո:
Ելիսեյան պալատում հայտարարել են, որ նախագահի որոշումը պայմանավորված է «երկրում ստեղծված իրավիճակին համապատասխան գործելու» և «իր վարքագծով օրինակ ծառայելու» ցանկությամբ:
Ֆրանսիայում երրորդ շաբաթն է, ինչ շարունակվում են կենսաթոշակային բարեփոխումների դեմ ուղղված զանգվածային բողոքի ակցիաները: Իշխանությունները բարձրացնում են կենսաթոշակային տարիքը 62-ից 64 տարեկան և ստեղծում են կենսաթոշակային միասնական ռեժիմ, ինչի արդյունքում մի շարք մասնագիտությունների ներկայացուցիչներ կզրկվեն արտոնություններից:
Ֆրանսիայի նախկին նախագահների կենսաթոշակը ամսական 6.220 եվրո է և կախված չէ ո՛չ նախագահի պաշտոնում գտնվելու ժամկետից, և ո՛չ էլ տարիքից: Սահմանադրական խորհրդի անդամի աշխատավարձը ամսական 13.500 եվրո է:
Կենսաթոշակային բարեփոխումները կանդրադառնան նաև պետության բարձրաստիճան պաշտոնյաների վրա: Ելիսեյան պալատում նշել են, որ նախագահական կենսաթոշակը նույնպես ձևավորվելու է միավորների հաշվեգրման միասնական համակարգի հիման վրա: