Խորվաթիայում մեկնարկել են նախագահական ընտրությունները: Ամբողջ երկրում բացվել են ընտրատեղամասերը՝ փոխանցում է RIA Novosti-ն:
Հանրապետության պետական ընտրական հանձնաժողովը գրանցել է 3 մլն 855 հազար ընտրողների, ովքեր կարող են իրենց ձայնը տալ 11 թեկնածուներից մեկին:
Նախագահի ընտրություններում երկրում և արտասահմանում կաշխատեն 6,6 հազար ընտրատեղամասեր, որոնցից 44-ը գտնվում են Բոսնիա Հերցեգովինայում, որտեղ ապրում են տեղի խորվաթներ:
Պետական ընտրական հանձնաժողովի տվյալներով՝ քվեարկության համար ընտրատեղամասերը բաց կլինեն տեղի ժամանակով ժամը 7-19-ը: Ընտրողների մասնակցության վերաբերյալ տեղեկությունները օրվա ընթացքում կթարմացվեն:
Ընտրությունների ընթացքին մտադիր են հետևել 24 հազար տեղական և արտասահմանյան դիտորդներ:
Վերջին հարցումների արդյունքներով՝ ֆավորիտներն են երկրի գործող նախագահ Կոլինդա Գրաբար-Կիտարովիչը, հանրապետության նախկին վարչապետ Զորան Միլանովիչը, ինչպես նաև երգիչ և ձեռնարկատեր Միրոսլավ Շկորոն:
Վերլուծաբանների կարծիքով՝ չափազանց քիչ է հավանականությունը, որ ընտրությունները կավարտվեն մեկ փուլով. պատճառը երեք թեկնածուների վարկանիշների միջև ոչ մեծ տարբերությունն է: Նախագահի պաշտոնի մյուս հավակնորդները զգալիորեն զիջում են առաջին եռյակին:
Ընտրությունների երկրորդ փուլը, եթե թեկնածուներից ոչ մեկը չհավաքի ընտրողների ձայների կեսից ավելին, կկայանա հունվարի 5-ին:
