ՀՀ կրթության, գիտության, մշակույթի և սպորտի նախարարությունը նախաձեռնել է հնագիտության մասին օրենքի նախագծի մշակում: ՀՀ կրթության, գիտության, մշակույթի և սպորտի նախարարի տեղակալ Նարինե Խաչատուրյանը նշեց, որ Հայաստանը բացառիկ հարուստ է այս առումով և մեծ ծրագրեր ունեն հնագիտության ոլորտի հետ կապված:
«Հյուսիս-Հարավ ճանապարհի վրա՝ հենց Ագարակ գյուղից սկսած մինչև Դաշտադեմ ունենք պեղված բնակավայրեր, որոնց հետ կապված պետք է ծրագրեր իրականացնենք: Մենք նպատակ ունենք ստեղծել «Archeopark» : Հայաստանում դեռևս նման բան չկա, սակայն ունենք համաշխարհային մոդելը և հիմա Հնագիտության և ազգագրության ինստիտուտի հետ մշակում ենք «Archeopark» ստեղծելու գաղափարը: Այն մեծ, թանկարժեք ծրագիր է»,- ասաց Նարինե Խաչատուրյանը:
Նախարարի տեղակալը նշեց, որ մեծ խնդիր ունենք մարդկանց իրազեկվածության հետ կապված, շատերի մոտ բացակայում է տարրական իմացությունը, թե ինչպես պետք է վարվել հուշարձանների հետ: Այդ իսկ պատճառով նախարարությունը սկսել է իրազեկման արշավներ իրականացնել: Արդեն աշխատանքային խմբեր են եղել Սյունիքում, Վայոց ձորում, Արարատում: Հանդիպում է եղել համայնքապետերի հետ, ներկայացվել է, թե որոնք են հուշարձանները, դրանց պահպանման գոտիները, թե ինչ պատասխանատվություն կկրեն եթե հուշարձանը աղճատվում է:
«Ես վստահ եմ, որ շատ դեպքերում մարդիկ չիմացությունից ելնելով են ինչ-որ գործողություններ կատարում: Շատերը չգիտեն, որ պատմական հուշարձանների տարածքում չի կարելի հուղարկավորություն կազմակերպել: Բայց հիմա գնացեք և տեսեք, որ որոշ հուշարձանների տարածքում կամ հուշարձան-գերեզմանատներում նոր թաղումներ կան: Մյուս կողմից էլ համայնքները նշում են, որ տարածք չունեն նոր գերեզմանոցների համար»,-ասաց Նարինե Խաչատուրյանն՝ ընդգծելով, որ մեկ այլ խնդիր է հուշարձանների հարևանությամբ տարածքների սեփականշնորհումը: Նա վստահեցրեց, որ ՀՀ կրթության, գիտության, մշակույթի և սպորտի նախարարությունը այս հարցում սերտորեն համագործակցում է Տարածքային կառավարման և ենթակառուցվածքների նախարարության հետ: Հարցերն իրենց օրակարգում են: