Դեմոկրատական կուսակցությունից ԱՄՆ նախագահի թեկնածու առաջադրվելու հավակնորդները դեկտեմբերի 19-ին Լոս Անջելեսում կայացած բանավեճերի ընթացքում հայտարարել են, որ իրենց տարիքը խոչընդոտ չէ նախընտրական պայքարում՝ տեղեկացնում է RIA Novosti-ն:
Բանավեճը վարողները մեջբերել են ԱՄՆ-ի նախկին նախագահ Բարաք Օբամայի այն խոսքերը, որ աշխարհում քաղաքական խնդիրները պահպանվում են նաև այն պատճառով, որ քաղաքական գործիչների ավագ սերունդը պատրաստ չէ հեռանալ ասպարեզից:
Ջո Բայդենը, որը փոխնախագահ էր Օբամայի օրոք, ի պատասխան կատակել է. «Կփորձեմ ենթադրել, որ նա իմ մասին չի խոսել»,-հայտարարել է 77-ամյա Բայդենը: Նա շեշտը դրել է այն բանի վրա, որ ինքը հարուստ փորձ ունի: «Ես իմ թեկնածությունն առաջադրում եմ, որովհետև վաղուց եմ աշխատում, առաջադրվում եմ իմ փորձի հիման վրա»,-ասել է Բայդենը:
Իր հերթին 78-ամյա սենատոր Բեռնի Սանդերսն ասել է, որ նախընտրական արշավում գլխավորը ոչ թե թեկնածուի տարիքն է, այլ մյուս հարցերը, նախևառաջ տնտեսական անհավասարությունը, և որ ինքը հույս ունի այդ հարցի շուրջ միավորել ինչպես երիտասարդ, այնպես էլ տարեց ամերիկացիներին: Հաղորդավարը նաև դիմել է 70-ամյա Էլիզաբեթ Ուորենին՝ հիշեցնելով, որ նա ընտրվելու դեպքում կդառնա նախագահի ամենատարեց թեկնածուն երդմնատվության պահին:
«Ես նաև ամենաերիտասարդ կինը կդառնամ երդմնատվության պահին»,-պատասխանել է Ուորենը: Ընտրություններում մի ամբողջ շարք թեկնածուներ 70-ից բարձր տարիք ունեն: Եվս մեկ դեմոկրատ հավակնորդ՝ Մայքլ Բլումբերգը, 77 տարեկան է, ինչպես և Բայդենը: Ներկայիս նախագահ Դոնալդ Թրամփը 73 տարեկան է, նա ներկայում ամենատարեց նախագահն է երդմնատվության պահին:
