ԱՄՆ-ի նախագահ Դոնալդ Թրամփի ժողովրդականության վարկանիշը հասել Է ամենաբարձր նշագծին, չնայած ԱՄՆ-ի Ներկայացուցիչների պալատի դատական կոմիտեում կայացած քվեարկությանը, որը հաստատել Է Թրամփի իմպիչմենթի երկու հոդված: Այդ մասին վկայում են Quinnipiac University-ի կողմից անցկացված հարցման տվյալները։
«Գրանցված ընտրողների քառասուներեք տոկոսը հավաստում Է, որ հավանություն Է տալիս նրա աշխատանքին, իսկ 52 տոկոսը հավանություն չի տալիս»,- ասված Է Quinnipiac University-ի մամուլի տեղեկագրում, որը հրապարակվել Է դեկտեմբերի 16-ին: Իմպիչմենթի շուրջ լսումների սկսվելուց առաջ հոկտեմբերի 23-ին անցկացված հարցման ընթացքում դրա մասնակիցների միայն 38 տոկոսն Էր հավանություն տվել նախագահի աշխատանքի արդյունքներին: Quinnipiac University-ի վերլուծաբան Մերի Սնոուի խոսքով՝ նախագահի աջակցման նման բարձր մակարդակը ի թիվս այլ բաների պայմանավորված Է նրանով, որ, ընտրողների կարծիքով, երկրում ամրապնդվել Է տնտեսությունը: Առանձնապես դրան նպաստում Է «մինչեւ 50-ամյա նվազագույն նշագիծ իջած գործազրկության մակարդակը արժեթղթերի ռեկորդային բարձր ցուցանիշների զուգակցությամբ»:
Հարցումն անցկացվել Է դեկտեմբերի 11-ից 15-ը: Դրան ամբողջ երկրում մասնակցել Է 1390 գրանցված ընտրող: Վիճակագրական անճշտությունը կազմում Է մոտավորապես 2,6 տոկոս, հաղորդել Է ՌԻԱ Նովոստին: