Գերմանական Deutsche Bahn երկաթուղային ընկերությունը մեկնաբանել է տեղեկությունները, որ շվեդ էկո-ակտիվիստ Գրետա Թունբերգի համար վագոնում ազատ նստատեղ չի գտնվել:
Նախօրեին Թունբերգը սոցցանցերում լուսանկար էր տեղադրել, որում նա Մադրիդում կայացած կլիմայի հարցերով գագաթնաժողովից Շվեդիա վերադառնալիս գնացքի վագոնում նստած է հատակին: Թունբերգը պարզաբանել է, որ Բազելից մեկնող գնացքի չեղարկման պատճառով ստիպված էր ճանապարհը շարունակել այլ գնացքներով:
Թեև ակտիվիստը շեշտել է, որ բազմամարդ գնացքները խնդիր չի համարում, «ընդհակառակը, մարդաշատ գնացքները լավ նշան են, քանի որ դա նշանակում է, որ գնացքներով երթևեկության պահանջարկը մեծ է», ակտիվիստի հրապարակումը վեճերի առիթ է դարձել սոցցանցերում:
Օգտատերերի միջև տարաձայնությունները սրվել են Deutsche Bahn-ի թվիթներից հետո, որոնցում ակտիվիստին հանդիմանել են ընկերության աշխատակիցներին սպասարկման համար շնորհակալություն չհայտնելու համար՝ առաջին կարգով երթևեկելու ժամանակ:
Դրանից հետո սոցցանցերի օգտատերերը Թունբերգին մեղադրել են երկերեսանիության մեջ, քանի որ նա լուսանկար է հրապարակել՝ չնշելով, որ իրեն արդյունքում տեղ հատկացրել են:
Ավելի ուշ ընկերությունը նաև մամուլի հաղորդագրություն է տարածել և պարզաբանել, որ Թունբերգը Քասելից Համբուրգ է մեկնել առաջին կարգով, ուղևորությունը տևել է մոտ երկու ժամ և էկո-ակտիվիստին սպասարկել են մնացած ուղևորներին համարժեք: