Վրացական GHN լրատվական գործակալության փոխանցմամբ՝ Վրաստանի արտգործնախարարությունը կտրուկ բողոքել է Ռուսաստանի պաշտպանության նախարար Անատոլի Սերդյուկովի աբխազական այցի դեմ։
Վրաստանի ԱԳՆ-ի տարածած հայտարարության մեջ նշված է, որ 2011 թվականի հուլիսի 13-ին Ռուսաստանի պաշտպանության նախարար Անատոլի Սերդյուկովը խախտել է Վրաստանի պետական սահմանը՝ ժամանելով օկուպացված Աբխազիա։
Վրաստանի ԱԳՆ-ը ընդգծում է, որ այդ այցը միանշանակ հաստատում է այն, որ Ռուսաստանը չի պատրաստվել և չի պատրաստվում կատարել իր միջազգային պարտավորությունները, այդ թվում նաև 2008 թվականի օգոստոսի 12-ին կնքված զինադադարի պայմանագիրը.
«Խախտելով նշյալ պարտավորությունները՝ Ռուսաստանն օկուպացված տարածքներում իրականացնում է ինտենսիվ ռազմականացում, ինչը դրսևորվում է ռազմական բազաների կառուցման արագացման, ռազմական կոնտինգենտի (ոչ միայն Պաշտպանության նախարարության, այլև՝ Անվտանգության դաշնային ծառայության) կոնցենտրացման և հարձակողական հրթիռային սպառազինման տեղակայման մեջ։
Օկուպացված տարածքներում փաստացիորեն ստեղծվել են հարվածային ռազմական խմբավորումներ, ինչը հաստատում է Վրաստանի նկատմամբ Ռուսաստանի ագրեսիվ պլաններ ունենալը։ Դրան պետք է հավելել օկուպացված տարածքներ Ռուսաստանի Դաշնության բարձրաստիճան պաշտոնյաների այցերը և էթնիկ մաքրումները։
Վրաստանի ԱԳՆ-ը կտրուկ բողոքում է դրա դեմ և Ռուսաստանից պահանջում է դադարեցնել օկուպացված տարածքների ռազմականացումը, ուժի չկիրառման մասին ստանձնած պարտավորությունները և սկսել Վրաստանի օկուպացրած տարածքների լիովին ապառազմականացման գործընթաց»։
Հիշեցնենք, որ օրեր առաջ Эхо Москвы ռադիոկայանին տված հարցազրույցում Վրաստանի նախագահ Միխեիլ Սաակաշվիլին հայտարարել էր, որ Ռուսաստանը Վրաստանն ընկալում է որպես էթնիկ միավոր և ոչ թե պետություն։
