Էստոնիայի ՆԳՆ նախարար, Պահպանողական ժողովրդական կուսակցության նախագահ Մարտ Հելմեն մեկնաբանել է Սաննա Մարինի նշանակումը Ֆինլանդիայի վարչապետի պաշտոնում՝ նշելով, որ «վաճառողուհին դարձել է վարչապետ»:
«Ֆինլանդիայում տեղի ունեցածից իմ մազերը բիզ-բիզ կանգնում են», – հայտարարել է ՆԳՆ նախարարը՝ հիշելով Վլադիմիր Լենինի խոսքերը, թե ցանկացած խոհարար կարող է դառնալ նախարար:
TRE Raadio-ին տված հարցազրույցում նա նաև նշել է, թե բացի վարչապետ դարձած վաճառողուհուց, կառավարության անդամ են դարձել փողոցային ակտիվիստներ և անգրագետ մարդիկ: Հելմեն կասկածում է, որ Ֆինլանդիայի նոր կառավարությունը կկարողանա պաշտպանել պետական շահերը:
Հիշեցնենք, որ նորընտիր վարչապետ Սաննա Մարինը ոչ միայն Ֆինլանդիայի ամենաերիտասարդ վարչապետն է, այլև աշխարհի. նա 34 տարեկան է: Ֆինլանդիան առաջին անգամ ղեկավարելու է «կանանց հնգյակը»․ մնացած բոլոր իշխող կուսակցությունների ղեկավարները նույնպես կին են: