Հեղափոխությունից հետո այս 1,5 տարում այնքան բաներ կան անելու, բայց առաջին խնդիրը պետք է դրվեր սովորական աշխատողի, քաղաքացու, թոշակառուի կյանքում իսկապես շոշափելի ինչ-որ բան փոխելը։ Այս մասին «Առաջին լրատվական»-ի հետ զրույցում նշեց դրամատուրգ Կարինե Խոդիկյանը։
Նրա խոսքով, այո, նշվում է, որ տնտեսական ծախսեր են արվում, որ Նոր տարուց կբարձրանան որոշ սոցիալական խմբերի աշխատավարձեր, կենսաթոշակներ, բայց Ամանորից հետո կբարձրանան նաև մթերքի գները, նաև գույքահարկն է բարձրանալու։
«Պետք է ոչ միայն պահանջել, այլև հասկանալ սովորական մարդու վիճակը։ Անցած տարի մի ցնցակաթված ստացանք, երբ պարզվեց, որ շատ բարձր պարգևավճարներ են բաժանել, որովհետև մենք համարում ենք, որ հեղափոխության ալիքի վրա իշխանության եկածները մահապարտներ են, որ եկել են իրենց վրա վերցնելու բոլոր հարվածները և աշխատելու, որովհետև նրանք ունեն ամենակարևորը ժողովրդի վստահությունը։ Բայց պարզվեց՝ այդպես չէ»,-ընդգծեց նա։