Երևան քաղաքի ընդհանուր իրավասության դատարանի՝ Կենտրոն վարչական շրջանում գտնվող նստավայրում Մնացական Մարտիրոսյանի նախագահությամբ շարունակվեց Հարություն Թորոսյանի և Հայկ Հայրապետյանի գործի դատական քննությունը:
Ըստ մեղադրանքի՝ աշխարհահռչակ նկարիչ Մարտիրոս Սարյանի ծոռը՝ Ղ. Ս.-ն, 2018 թվականի հոկտեմբերին դիմել է Հարություն Թորոսյանին՝ «այլ անձանց տիրապետության տակ գտնվող գույքը՝ նկարները, վերցնելու խնդրանքով»:
Հարություն Թորոսյանը, ըստ մեղադրանքի, որոշել է առիթն օգտագործել ու իր ծանոթ Հայկ Հայրապետյանի օժանդակությամբ Ղ. Ս.-ից առանձնապես խոշոր գումար շորթել:
2018 թվականի հոկտեմբերի 30-ին Հարություն Թորոսյանն իր որդու՝ Պ.- ի և Հայկ Հայրապետյանի հետ գնացել է Ղ. Ս.-ի հետ հանդիպման: Բնակարան են բարձրացել Հայկ Հայրապետյանն ու Թորոսյանի որդին: Թորոսյանն ասել է, թե քիչ անց կմիանա նրանց: Որոշ ժամանակ անց Թորոսյանի որդին դուրս է եկել բնակարանից՝ ասելով, թե կվերադառնա, բայց չի վերադարձել: Հարություն Թորոսյանն է եկել այդ բնակարան ու հայտնել է, թե որդուն բռնել, մոտը թմրամիջոց են գտել ու ձերբակալել են և, իբր, ազատ արձակելու համար պահանջել են 250 հազար դոլար:
Հարություն Թորոսյանը, ըստ մեղադրանքի, Ղ. Ս.-ին ու Հայկ Հայրապետյանին է մեղադրել որդու ձերբակալման համար ու պահանջել է, որ նրանք ճարեն ու իրեն տան 250 հազար դոլար, այլապես, ըստ մեղադրանքի, սպառնացել է վնասել նրանց ու նրանց ընտանիքի անդամներին:
Ըստ մեղադրանքի՝ Ղ. Ս.-ն վախենալով՝ համաձայնել է, բայց ժամանակ է խնդրել, որ գումար ճարի: Թորոսյանը ժամանակ է տվել:
Այդ ընթացքում, ըստ մեղադրանքի, Հայկ Հայրապետյանը, Հարություն Թորոսյանի հետ կազմած ծրագրի համաձայն՝ Ղ. Ս.-ին վախեցրել է՝ ասելով, թե պահանջված գումարը չստանալու դեպքում Թորոսյանը կիրագործի սպառնալիքները: Հայրապետյանը հայտնել է նաև իրականությանը չհամապատասխանող տեղեկություն, թե ինքը, իբր, Թորոսյանին արդեն տվել է 40 հազար դոլար:
Հարություն Թորոսյանը «մնացած» 210 հազար դոլարը պահանջել է Ղ. Ս.-ից՝ նրա ու նրա մերձավորների նկատմամբ բռնություն գործադրելու սպառնալիքով:
Ստեղծված իրավիճակում Ղ. Ս.-ն իր նկատմամբ կատարվող շորթման մասին տեղեկացրել է իրավապահներին:
Ղ. Ս.-ն Հարություն Թորոսյանի հետ պայմանավորվել է, որ գումարի մի մասը ճարել է ու կարող է հանձնել նրան: Հայկ Հայրապետյանը, ըստ մեղադրանքի, Թորոսյանին է տրամադրել իր «Մերսեդես» մեքենան, և 2018 թվականի նոյեմբերի 3-ին Թորոսյանն ու Հայրապետյանը Թորոսյանի վարած «Մերսեդեսով» գնացել են Հանրապետության հրապարակ՝ Ղ. Ս.-ից գումարը վերցնելու:
Հանրապետության հրապարակում իրականացվել է օպերատիվ-հետախուզական գործողություն, Ղ. Ս.-ն, ըստ մեղադրանքի, Թորոսյանին է հանձնել 80 հազար դոլար, ինչից հետո ԱԱԾ աշխատակիցներն իրականացրել են ենթադրյալ շորթումը կատարած անձանց բռնելու գործողություն…
Այդ ժամանակ, ըստ մեղադրանքի, Հայկ Հայրապետյանը դիմադրել է իրավապահներին, կյանքի ու առողջության համար ոչ վտանգավոր բռնություն է գործադրել ԱԱԾ աշխատակից Յ. Դ.-ի նկատմամբ՝ ձեռքերով հարվածել է նրան ու պատճառել է թեթև վնասի հատկանիշներ չպարունակող վնասվածքներ:
Բացի այդ, հաջորդ օրը Հայկ Հայրապետյանի բնակարանում կատարված խուզարկությամբ հայտնաբերվել ու առգրավվել է առանձնապես խոշոր չափի թմրամիջոց:
Այսպիսով՝ Հարություն Թորոսյանին մեղադրանք է առաջադրված բռնություն գործադրելու սպառնալիքով առանձնապես խոշոր չափերի գումար շորթելու համար՝ ՀՀ քրեական օրենսգրքի 182 հոդվածի 3-րդ մասի 2-րդ կետով:
Հայկ Հայրապետյանին մեղադրանք է առաջադրված առանձնապես խոշոր չափերի շորթմանն օժանդակելու, իրավապահ մարմնի աշխատողին դիմադրություն ցույց տալու և առանձնապես խոշոր չափերի ապօրինի թմրամիջոց ձեռք բերելու, պահելու համար՝ ՀՀ քրեական օրենսգրքի 38-182 հոդվածի 3-րդ մասի 2-րդ կետով, 316 հոդվածի 1-ին և 268 հոդվածի 3-րդ մասերով:
Դատարանում Հարություն Թորոսյանն ասել է, որ իրեն մեղավոր չի ճանաչում:
Հայկ Հայրապետյանը հայտարարել է, թե դիրքորոշում չի հայտնում:
Ավելի վաղ դատական նիստից դուրս Հայկ Հայրապետյանն ասել էր, թե ընդհանրապես կապ չունի «շորթում» մեղադրանքի հետ, Թորոսյանին չի օժանդակել ու գաղափար չունի՝ ինչի մասին է խոսքը: 2018 թվականի նոյեմբերի 3-ին Հարությունը խնդրել է, որ տրամադրի իր մեքենան, ինքը ընկերաբար տրամադրել է: Ինչ վերաբերում է ԱԱԾ աշխատողին դիմադրություն ցույց տալուն, ապա ինքը որևէ մեկին, այդ թվում՝ գործով տուժող ճանաչված երիտասարդին չի դիմադրել, այդ երիտասարդին չի էլ տեսել: Հակառակը՝ բերման ենթարկելու ժամանակ իր նկատմամբ են բռնություն գործադրել, ու ինքը բազմաթիվ վնասվածքներ էր ստացել…
Գործով կալանքի տակ է միայն Հարություն Թորոսյանը: Հայկ Հայրապետյանը գրավով ազատ է արձակվել:
Դատական այս նիստի սկզբում Հարություն Թորոսյանի շահերի պաշտպան, փաստաբան Թ. Ալեքսանյանը միջնորդություն ներկայացրեց իր պաշտպանյալին գրավի կիրառմամբ ազատ արձակելու վերաբերյալ:
Գործով մեղադրող դատախազ Ս. Պողոսյանն ու տուժող Ղ. Ս.-ի ներկայացուցիչ փաստաբանը առարկեցին պաշտպանի միջնորդության դեմ: Մեղադրողը հիշատակեց, որ չեն վերացել Հարություն Թորոսյանին կալանքի տակ պահելու հիմքերը, մասնավորապես՝ գործի քննության ընթացքում նա անգամ կալանավայրում գտնվելով՝ զանգահարել է տուժողին ու փորձել է ազդեցություն գործել նրա վրա:
Դատարանը, կողմերին լսելով, հեռացավ խորհրդակցական սենյակ: Որոշ ժամանակ անց դատարանը հրապարակեց որոշումը: Պաշտպանի միջնորդությունը մերժվեց՝ անհիմն լինելու պատճառաբանությամբ: Հարություն Թորոսյանը կմնա կալանքի տակ:
Դատարանը քրեական գործում առկա գրավոր փաստաթղթերի և այլ ապացույցների հրապարակման ու հետազոտման փուլում է:
Քրեական գործը բաղկացած է 4 հատորից:
Հրապարակվեց ԱԱԾ աշխատակից, գործով տուժողի կարգավիճակ ունեցող Յ. Դ.-ի նկատմամբ կատարված դատաբժշկական փորձաքննության եզրակացությունը, համաձայն որի՝ նրա ստացած վնասվածքները առողջության թեթև վնասի հատկանիշներ չեն պարունակում:
Դատաքիմիական փորձաքննության եզրակացության համաձայն՝ Հայկ Հայրապետյանի բնակարանի խուզարկությամբ հայտնաբերված մի քանի տեսակի դեղահաբերի մեջ հաստատվել է առանձնապես խոշոր չափերի թմրամիջոցների առկայությունը:
Տոքսիկոքիմիական փորձաքննության եզրակացության համաձայն՝ Հայկ Հայրապետյանից վերցված փորձանմուշներում հայտնաբերվել են թմրամիջոցների հետքեր՝ օգտագործման՝ մինչև երկու ամիս վաղեմությամբ:
Հայկ Հայրապետյանին պատկանող, գործով իրեղեն ապացույց ճանաչված «Մերսեդեսի» խուզարկությամբ հայտնաբերվել և իրեղեն ապացույց են ճանաչվել 655 հատ թղթադրամ՝ 80 հազար դոլարին համարժեք գումար:
Հրապարակվեց Հայկ Հայրապետյանի բնակարանում կատարված խուզարկության արձանագրությունը: Բնակարանի կոմոդի դարակում, պատի ճեղքում ու պահարանում հայտնաբերվել են մեծ թվով դեղահաբեր, դատաքիմիական փորձաքննությամբ հետագայում այդ դեղահաբերի պարունակության մեջ հայտնաբերվել են թմրամիջոցներ:
Դեպքից հետո Ճանապարհային ոստիկանությունից առգրավվել է Երևանի Հանրապետության հրապարակում՝ դեպի Տիգրան Մեծի ու Մելիք-Ադամյան փողոցներ տանող հատվածում առկա տեսահսկող սարքերի տեսագրությունները պարունակող կրիչը:
Առգրավվել է «Արտաքին դիտում» օպերատիվ-հետախուզական միջոցառման տեսագրությունը պարունակող կրիչը, որի զննությամբ երևացել է՝ ինչպես է Հարություն Թորոսյանն իր վարած «Մերսեդեսը» կայանում Հանրապետության հրապարակում: Մեքենային է մոտենում տուժող Ղ. Ս.-ն, տոպրակ է փոխանցում մեքենայի մեջ նստածներին, դրանից անմիջապես հետո ԱԱԾ աշխատակիցները վազելով մոտենում են «Մերսեդեսին» որը տեղից պոկվում, առաջ է սլանում ու հետիոտնային անցումի վրա կատարում է քաղաքացու վրաերթ…
Քրեական գործում առկա են ամբաստանյալ Հարություն Թորոսյանի հեռախոսազանգերի ու հեռախոսային հաղորդագրությունների վերծանումները, որոնցից երևում է, որ Հարություն Թորոսյանը հեռախոսային խոսակցություններ է ունեցել տուժող Ղ. Ս.-ի հետ, ինչպես նաև «Վայբեր» ծրագրով նամակագրություն է ունեցել վերջինիս հետ և գումար է պահանջել: Առկա է նաև 2019 թվականի հունվարին, երբ Հարություն Թորոսյանը գտնվում էր մեկուսարանում, նրա կողմից տուժող Ղ. Ս.-ի հետ հեռախոսակապի վերծանումը, որով, ըստ մեղադրողի, հաստատվում է, որ անազատության մեջ գտնվող ամբաստանյալը փորձել է ազդեցություն գործել տուժողի վրա:
Հրապարակվեց Հայկ Հայրապետյանին բերման ենթարկելու արձանագրությունը:
Ամբաստանյալ Հայկ Հայրապետյանի շահերի պաշտպան, փաստաբան Ա. Ղազարյանը միջնորդեց, որ իրեղեն ապացույց ճանաչված «Մերսեդես» մեքենան, որը գտնվում է պետկան պահպանության տակ, հանձնվի տիրոջը՝ Հայկ Հայրապետյանին՝ ի տնօրինումն:
Ըստ պաշտպանի՝ մեքենայի մեջ են Հայրապետյանի անձնական իրերը՝ հագուստ և այլն, բացի այդ՝ մեքենան վթարված, խիստ վնասված վիճակում է, Հայրապետյանը կարող է իր ունեցվածքը տնօրինել…
Նախագահողը նշեց, որ միջնորդությունը ոչ ժամանակին է արվում, մեքենան մեքենատիրոջն ի տնօրինություն հանձնելու հարցը կքննվի հաջորդ նիստում, երբ իրեղեն ապացույց ճանաչված մեքենան կզննեն կամ կհամարեն զննված դատավարության կողմերը ու չեն առարկի միջնորդության դրական լուծման դեմ:
Դատական հաջորդ նիստին՝ դեկտեմբերի 18-ին, դատարանը կշարունակի քրեական գործում առկա փաստաթղթերի և այլ ապացույցների հետազոտումը:
