Պետական կառավարման համակարգում հեղափոխությանը, նրա դավանած արժեքներին դիմադրության մասին ՀՀ վարչապետ Նիկոլ Փաշինյանի հայտարարությունը կառավարության նիստում հերթական անգամ հանրային լուրջ քննարկման թեմա է դարձել։ «Չնեղանաք, բայց Հայաստանում կոռուպցիայի դեմ պայքարը կրկին տեղի է ունենում ի հեճուկս պետական կառավարման համակարգի, որովհետև ամբողջ իրավապահ համակարգին պետք է որոշ ժամանակ անց ասես՝ իսկ ի՞նչ եղավ։ Ու պատճառ միշտ էլ կգտնվի, միշտ պատճառ կա՝ փորձաքննություն է, այն մեկը փախավ, այն մեկը ուզում է փախչի, մյուսը ցուցմունք չի տալիս։ Եվ եկեք արձանագրենք, որ ամբողջ պետական համակարգը, այո՛, հեղափոխությանը դիմադրում է։ Եվ այդ դիմադրությունը ես ջարդելու եմ, չկա ուրիշ տարբերակ, որովհետև ՀՀ ժողովուրդն անձամբ ինձ ու իմ քաղաքական թիմին ձայն է տվել, որ այս երկրում փոփոխություն տեղի ունենա, ոչ թե տարբեր առիթներով անընդհատ պտտվենք ու պտտվենք։ Հերիք է այս կեղծիքի մեջ մենք անընդհատ ապրենք»,- կառավարության վերջին նիստում հայտարարել է ՀՀ վարչապետ Նիկոլ Փաշինյանը։
Փաշինյանի ընդդիմախոսներն այն վարկածն են առաջ քաշում, որ վարչապետն ուզում է ազատվել հին, փորձառու կադրերից՝ նրանց փոխարինելով հեղափոխության օրերին իր հետ քայլածներով, որոնց մի մասը ներգրավվել են Ազգային ժողովում և կառավարությունում, թեև դրա համար չունեն բավարար փորձ ու գիտելիքներ։ Այլոք պնդում են, որ պետք է փոխել կարծրացած պետական համակարգը, այնտեղ բերել ստեղծարար գաղափարներ կրող երիտասարդների, որոնք թարմ շունչ կհաղորդեն այդ համակարգին։
Մշակութաբան Արա Նեդոլյանը տարակուսած է, թե ինչու այդ մասին հայտարարվում է այսօր, ոչ թե հեղափոխության օրերին։ Նա տարօրինակ է համարում, որ չեն փոխվել տարբեր վարչությունների գործառույթները, չեն ներգրավվել մարդիկ, որոնք ընդունակ էին իրականացնելու բարեփոխումներ, իսկ այն մարդիկ, որոնք կարող էին իրականացնել դրանք, հեռացրեց պաշտոններից (նկատի ունի մշակույթի փոխնախարար Նազենի Ղարիբյանին, կրթության և գիտության փոխնախարար Հովհաննես Հովհաննիսյանին, քաղաքաշինության պետական կոմիտեի նախագահ Սարհատ Պետրոսյանին, բնապահպանության տեսչական մարմնի ղեկավար Արթուր Գրիգորյանին)։
Մեր զրուցակիցը կարծում է, որ վարչապետը չի ձևակերպել և պետական ապարատի առջև չի դրել լուրջ խնդիրներ, թե ինչ փոփոխություններ պետք է իրականացնեն։ Իսկ փոփոխություններն, ըստ նրա, լինում են ապարատի ներսում, նաև՝ ապարատից դուրս։
«Դա հանգեցրել է այն բանի, որ համակարգը զբաղված է ինքնակենսագործունեությամբ, այսինքն՝ չի կատարում իրեն վերապահված գործառույթները»,- եզրակացնում է Արա Նեդոլյանը։
