Հրապարակվեց Ռոբերտ Քոչարյանի նոր հարցազրույցը, նա ի թիվս այլ հարցերի և խնդիրների, նշել է, որ «այն հասարակությունը, որտեղ մարդիկ ուրախանում են կալանքներից, չի կարող ստեղծարար լինել, չարացած մարդիկ ավելի շատ են հակված մանիպուլյացիաների և հակահերոսներ փնտրելու»:
Թեմայի շուրջ «Առաջին լրատվական»-ի հետ զրույցում հրապարակախոս, ռեժիսոր Տիգրան Պասկևիչյանը, անդրադառնալով այս դիտարկմանը և հարցին, թե արդյոք չարացած է մեր հասարակությունը, նշեց. «Չեմ կարծում, թե մեր հասարակությունը չարացած է և ուրախանում է կալանքներից: Կան կալանքներ, որոնք անհրաժեշտ են, դրանցից մեկը Ռոբերտ Քոչարյանի կալանավորված լինելն է, որին բավական երկար ժամանակ մեր հասարակությունը սպասել է և այսօր մեծ ուշադրությամբ հետևում է:
Երևի ինչ-որ բան շփոթում է Քոչարյանը՝ հասարակության վերաբերմունքը և ուրախանալը: Երբ Ռոբերտ Քոչարյանի համար գնում էին մարզեր ստորագրություններ հավաքելու, ի՞նչ վերաբերմունքի էին արժանանում, այդ մասին պետք է մտածի Ռ. Քոչարյանը»:
«Իմ նախագահության առողջ քննադատությանը ես պատրաստ եմ,- նշել է Ռ. Քոչարյանը հարցազրույցում:- Հեգնանքը նրանում է, որ մեղադրանքները, որպես կանոն, ոչ մի ընդհանուր բան չունեն իրականության հետ: Այն, ինչի համար ինձ կարելի է և արժե քննադատել, չի հիշատակվում ընդհանրապես»: Անդրադառնալով այս դիտարկմանը՝ Տ. Պասկևիչյանն ընդգծեց, որ Քոչարյանը հետագայում օբյեկտիվորեն քննադատված լինելու շանսը կորցրել է 2008թ. փետրվարի 29-ին. «Նա այդ ժամանակ պետք է մտածեր՝ ինչպես հեռանա: Եթե դու հեռացել ես այդպես, ուրեմն բարի եղիր պատասխան տալ և չխոսել քննադատվելու որակի կամ տեսակետների մասին»:
«Այսօր Ռ. Քոչարյանը և նրա շուրջը եղած մի շարք մարդիկ պետք է պատասխան տան, թե ինչու 2008թ. Մարտի 1-ին արյուն թափվեց Երևանում»,- ընդգծեց մեր զրուցակիցը:
Ռ. Քոչարյանը նաև նշել է, որ 1998թ. բնակչության զգալի մասը պահանջում էր նստեցնել Տեր-Պետրոսյանին և ընդհանրապես՝ ՀՀՇ ամբողջ վերնախավին, բայց ինքը համարել է, որ պետք է ապագա կառուցել: Տ. Պասկևիչյանը հակադարձեց՝ նշելով, որ այդպիսի բան չի եղել. «Չեմ հիշում, որ մեր հասարակությունը պահանջեր կալանավորել Տեր-Պետրոսյանին, դատապարտել ՀՀՇ-ին: Ինչ-որ չափով կար լարվածություն, բայց Տեր-Պետրոսյանի խոհեմ հրաժարականի տեքստը և նրա հետ բավականին մեծ թիմի հեռանալը բավականին պարպել էր այդ լարվածությունը»:
Մանրամասն՝ տեսանյութում:
