Միացյալ Նահանգների Սենատի կողմից Ցեղասպանության վերաբերյալ բանաձևի ընդունմանը արձագանքել են տարբեր թուրք պաշտոնյաներ, այդ թվում՝ Թուրքիայի փոխնախագահ Ֆուաթ Օքթայը, պաշտպանության նախարար Հուլուսի Աքարը, արդարադատության նախարար Աբդուլհամիթ Գյուլը, խորհրդարանի նախագահ Մուստաֆա Շենթոփը:
Թուրքիայի փոխնախագահ Օքթայը կրկին հիշեցրել է թուրքական արխիվների մասին՝ նշելով․ «ԱՄՆ-ն այդ բանաձևի միջոցով փորձում է ստերով լի նոր պատմություն գրել: Մինչդեռ պատմության իրական վկաները ոչ թե սենատների և խորհրդարանների որոշումներն են, այլ արխիվները»:
Ըստ պաշտպանության նախարար Հուլուսի Աքարի, քաղաքական գործիչները պատմական հարցերում որոշումներ չպետք է ընդունեն: Նրա կարծիքով՝ արխիվներն ուսումնասիրելու դեպքում բոլորը կտեսնեն, որ թուրք ազգի պատմությունը «մաս-մաքուր» է:
Արդարադատության նախարար Աբդուլհամիթն էլ կարծում է, որ պատմությունը քաղաքականացնելուց ոչ մի պետություն չի շահել՝ կրկին հիշեցնելով արխիվների մասին:
Թուրքիայի խորհրդարանի նախագահ Շենթոփը ևս խոսել է արխիվներից՝ հիշեցնելով, որ Թուրքիան 2005թ-ին առաջարկել է Հայաստանին պատմաբանների համատեղ հանձնաժողով ստեղծել՝ արխիվներն ուսումնասիրելու համար: Նա նաև կոչ է արել լուրջ չընդունել Սենատի որոշումը, քանի որ ԱՄՆ-ին չեն հետաքրքրում հայերը կամ 1915թ դեպքերը: Շենթոփի կարծիքով՝ Վաշինգթոնը պարզապես ցանկացել է Թուրքիային պատժել: