Ֆուտբոլի ֆեդերացիայի նախկին նախագահ Ռուբեն Հայրապետյանի տանը ոստիկանությունը վաղ առավոտից խուզարկություն է իրականացրել: Ոստիկանությունից փոխանցել են, որ կա հարուցված քրեական գործ, դրա շրջանակներում էլ գործողություններ են իրականացվում, սակայն չեն մանրամասնել, թե ինչ քրեական գործի մասին է խոսքը:
2008 թվականի քաղաքական իրադարձություններից հետո գործարար Խաչատուր Սուքիասյանին պատկանող «Բջնի» գործարանն աճուրդի էր հանվել, ու հենց Ռուբեն Հայրապետյանն էր այն գնել: Լուրեր կան, որ այս խուզարկությունը նաև այդ գործի շրջանակներում է: Մամուլի որոշ հրապարակումների համաձայն, Ռուբեն Հայրապետյանը նաև «Զարգացման հայկական բանկի» ու Զեյթունի կահույքի ֆաբրիկայի սեփականատերն է: 2012-2018 թվականներին զբաղեցնելով Ֆուտբոլի ֆեդերացիայի նախագահի պաշտոնը, ըստ լրատվական կայքերի, կազմակերպել է ֆուտբոլի մարզադաշտերի ու մարզադպրոցների կառուցման ու վերանորոգման աշխատանքներ: Դրանց ընթացքում չի կատարել կամ մասնակի է կատարել պայմանագրով նախատեսված պարտականությունները ու յուրացրել է առանձնապես խոշոր չափերի գումարներ: Այդ մասին պաշտոնական տեղեկություն չկա: Ըստ այդ լուրերի, նա այդ ընթացքում միլիոնավոր դոլարների պայմանագրեր է կնքել հենց իր ընկերությունների հետ շինարարության համար: Այս նկարագրությունը պատահական չարեցինք․ Ռուբեն Հայրապետյանը կարող է անցնել մի քանի խոշոր գործերով, մանավանդ որ եղել է նախագահ Սերժ Սարգսյանի մերձավոր շրջապատից ու ենթադրելի է, որ մասնակցել է նախկին իշխանության հանցավոր գործողություններին։
Նեմեց Ռուբո մականունով հայտնի օլիգարխի կցկտուր բացատրություններից, իհարկե, կարելի է հասկանալ, որ խուզարկությունը կապված է ՀՖՖ նախագահի պաշտոնում նրա պաշտոնավարման հետ, համենայնդեպս, նա տվել է Արմեն Նիկողոսյանի անունը, որը մարզական մեկնաբան է ու ֆեդերացիայի գործող գործկոմի անդամ։
«Միանգամից ասեմ ձեզ՝ որևէ հարցի չեմ պատասխանելու, մեկ, երկրորդը՝ ինձ չեն ձերբակալում և չեն ձերբակալել: Իզուր տեղը մի կանգնեք, հետ գնացեք, Արմեն Նիկողոսյան, էդ մատնաչափիկին հարցրեք»,- խուզարկության ավարտից հետո իր առանձնատան մոտ լրագրողներին ասել է Հայրապետյանը:
Լրագրողների հարցին՝ խուզարկության արդյունքում ինչ-որ բան հայտնաբերվե՞լ է, նա հեգնել է․ «Հա, մի հատ SU-35 սամալյոտ են գտել, ինքնաթիռ, մի հատ T-90 տանկ, մի քանի հատ էլ БТР u БМП»:
Միանգամից աչքի է զարնում քրեականացված այս օլիգարխի ցինիզմը, որը հնարավոր չէ այլ կերպ բնորոշել, քան մարտահրավեր ոստիկանությանը կամ օրինականության հաստատման գործընթացին։ Պատկերացնո՞ւմ են՝ ոստիկանությունը ներկայացնում է դիմակավորված «սպեցնազի» գործողության տեսարան, իսկ Հայրապետյանը նրան փաստորեն ծաղրում է՝ խուզարկությունը ներկայացնելով որպես շոու։ Ուշագրավ է, որ Նեմեց Ռուբոն իրեն դարձյալ վեր է դասում օրենքից՝ որակումներ տալով կոնկրետ մարդու, «բեսպրեդելի» հասնող ցինիզմով որոշելով իր ձերբակալվել-չձերբակալվելու հարցը։
Ռուբեն Հայրապետյանի ցինիզմը սթափեցնող ապտակ է ոստիկանության համար, ու առնվազն խորհելու տեղիք պետք է տա, որովհետև պոտենցիալ հանցագործի, քրեական հետագիծ ունեցող անձի նման պահվածքը վկայում է ոստիկանության, իրավապահ համակարգի անհուսալի խեղճության մասին։ Այսպիսի դրվագները բազմաթիվ են, ու բոլոր դեպքերում ոստիկանությունը նսեմացվում է։ Անհրաժեշտ է րոպե առաջ լուրջ ինստիտուցիոնալ բարեփոխումներ իրականացնել ոստիկանությունում, ԱԱԾ-ում՝ նրանց «պորտալարը» հին համակարգի հետ կտրելու համար։ Այդ դեպքում Նեմեց Ռուբոն ու մյուսները «դուխով» չեն արտահայտվի։