Դեկտեմբերի 12-ին տեղի ունեցավ PMI Science-ի և Ձեռնարկությունների Ինկուբատոր Հիմնադրամի համատեղ Datathon ծրագիրը, որն իրականացվում է արդեն երկրորդ անգամ։ Ծրագիրը նպատակ ունի խթանել գենոմի ոլորտի ուսումնասիրությունները Հայաստանում և հանդիսանում է բացառիկ հնարավորություն հայ գիտական հանրության համար։
«Մենք Datathon միջոցառումը կազմակերպել ենք «PMI Science»-ի, ինչպես նաև Ձեռնարկությունների ինկուբատոր հիմնադրամի և Կենսաինֆորմատիկայի խմբի հետ համատեղ, ավելին, LABZ.AL ընկերությունը իր տվյալագետների խմբին տրամադրել է մեզ, որոնք այս ամբողջ ընթացքում օգնել են մեզ իրականացնելու այս ծրագիրը։ Ի սկզբանե սկսել ենք 3 շաբաթ առաջ և ունեցել ենք 110 դիմորդ, որոնցից վերջնական փուլ անցել են 67 հոգի և 22 խումբ։ Այս խմբերը մոտ 9 օր աշխատել են ԴՆԹ հետազոտությունների ոլորտում բիոինֆորմատիկների խմբի կողմից տրամադրված տվյալների վրա, որն իրենից ներկայացնում է ԴՆԹ-ի քրոմոսոմների վերջույթներ, որոնք կոչվում են թելոմերներ։ Թելոմերների ուսումնասիրությունը շատ կարևոր դեր է կատարում քաղցկեղի և ծերացման ուսումնասիրության գործում։ Այս 22 խմբերից միայն 7-ն անցան եզրափակիչ փուլ և նրանցից երեքն էլ կհայտարարենք այսօրվա հաղթողներ»,- ասաց ISTC հիմնադրամի Start up աքսելերացիոն ծրագրերի կոորդինատոր Գայանե Հակոբյանը:
«Ֆիլիպ Մորրիս» ընկերության գիտահետազոտական կենտրոնի էկոհամակարգերի ղեկավար Մարիամ Դավթյանն իր հերթին շեշտեց, որ իրենց նպատակն է խթանել միջդիսցիպլինար ոլորտների համագործակցությունը, մասնավորապես բիոինֆորմատիկայի, մոլեկուլյար բիոլոգիայի ոլորտի գիտական աշխատանքների և ծրագրավորողների։
«Անցյալ տարի իրականացված միջոցառումը վերաբերում էր միկրոբիոմիքսին, միկրոբիոտային վերաբերող գենետիկական տվյալների վերլուծությանը, իսկ այս տարի արդեն հայկական գենոմին է վերաբերում, այսինքն հայկական ԴՆԹ կոդի վերլուծությանը վերաբերող տվյալների մշակման մասին է։ Ինչ է սա նշանակում․ ինչպես գիտեք հիմա ամբողջ աշխարհում ինովացիան գտնվում է ոլորտների խաչմերուկում, այսինքն դա միայն մաթեմատիկա չի, դա միայն կենսաֆիզիկա չի, դա միայն ֆիզիկա չի, այլ նորարարությունը թափանցում է արդեն գիտություն և տեխնոլոգիաները շատ են օգնում գիտությանը ։ Ծրագրին մասնակցել են գրեթե 100 հոգի գիտնականներ, տվյալագետներ և ծրագրավորողներ, ովքեր օգնել են մոլեկուլային կենսաբանության ոլորտի գիտնականներին մշակելու և գտնելու տվյալների վերլուծության ավելի արդյունավետ մեթոդ և միջոցներ։
Կենսաբանները և ծրագրավորողները մի քանի շաբաթ համատեղ աշխատել են և արդյունքում 7 թիմեր , որոնք անցել են հաջորդ փուլ իրենց աշխատանքներով նրանցից էլ երեքն էլ այսօր կստանան մրցանակներ լավագույն լուծումների համար»,-հավելեց նա։
Նախաձեռնության հեղինակները խիստ կարևորեցին այսպիսի ծրագրերի շարունակական իրականացումը՝ նշելով, որ այսպիսով տվյալագետների և կենսաբանների միջև համագործակցության մի նոր մշակույթ է ներդրվում, ինչն էլ իր հերթին հետագայում կարող է տարածվել նաև այլ ոլորտների վրա։
Առավել մանրամասն՝ տեսանյութում: