ԱՄՆ Կոնգրեսի վերին պալատը՝ Սենատը, դեկտեմբերի 12-ին միաձայն ընդունեց Հայոց ցեղասպանության ճանաչման և դատապարտման մասին բանաձևը: Հիշեցնենք, որ Սենատի այդ բանաձևը մի քանի անգամ արգելափակվեց Էրդողանի ԱՄՆ կատարած այցի ժամանակ:
Թեմայի շուրջ «Առաջին լրատվական»-ը զրուցել է Թուֆենկյան հիմնադրամի տնօրեն Րաֆֆի Դուդակլյանի հետ:
Ի՞նչ տեղի ունեցավ Էրդողանի այցից հետո և ինչպես եղավ, որ Սենատը ընդունեց բանաձևը. անդրադառնալով այս հարցին Րաֆֆի Դուդակլյանը նշեց. «Մի կողմից մեծ ճնշումներ կային՝ Էրդողանի պատվիրակության, ամբողջ թուրքական դիվանագիտական համակարգի մասնակցությամբ: Թրամփին ճնշումների ենթարկեցին, որպեսզի կանխեն բանաձևի ընդունումը Սենատի կողմից: Միաժամանակ այլ աշխատանքներ էին իրականացվում հակառակ ուղղությամբ… Պետք է հաշվի առնել նաև ամերիկյան քաղաքական ինստիտուտների, մանավանդ վերջին 6 ամիսների տրամադրվածությունը Թուրքիայի քաղաքականության նկատմամբ. բավականին ժխտական են տրամադրված: Նաև պետք է հաշվի առնել ամերիկահայ համայքնի՝ ուժերի, անհատների, աստղերի կազմակերպած աշխատանքները: Շահերի համընկնում եղավ, ամերիկահայ համայնքի աշխատանքներին համընկան ԱՄՆ-ի հակաթուրք տրամադրությունները, Էրդողանին դաս տալու մոտեցումները և ամերիկյան քաղաքական ուժային կենտրոնների բարենպաստ դիրքորոշումն այս հանգրվանում: Այս ամենը նպաստեց, որ բանաձևն ընդունվի… »:
Մեր զրուցակիցը նաև ընդգծեց, որ այս բանաձևի ընդունումն, անշուշտ, հայության համար ուրախալի է, բայց անհրաժեշտ է անդրադառնալ այն խնդրին, թե Թուրքիան այսուհետ ինչ քայլեր կարող է ձեռնարկել. «Պետք է մտածենք այդ մասին և որոշենք, թե ինչ հակաքայլեր պետք է ձեռնարկենք… Թուրքիան պետք է հասկանա, որ Ցեղասպանության ճանաչման գործընթացն այլևս անշրջելի է»:
Մանրամասն՝ տեսանյութում: