ՀՀ նախկին վարչապետ Կարեն Կարապետյանն ընդգրկվել է ՌԴ կառավարությանը կից փորձագիտական խորհրդի նախագահության կազմի մեջ:
«Ինտերֆաքսը» տեղեկացնում է, որ ՌԴ վարչապետ Դմիտրի Մեդվեդևի կարգադրությամբ հաստատվել է փորձագիտական խորհրդի նախագահական կազմը. վերջինիս համակարգողն է դարձել ՌԴ նախագահի աշխատակազմի նախկին ղեկավար Ալեքսանդր Վոլոշինը: Վոլոշինից բացի, խորհրդում ներառվել են ՌԴ կառավարության երեք նախկին ղեկավարներ՝ Վիկտոր Զուբկովը, Սերգեյ Ստեպաշինը և Միխայիլ Ֆրադկովը, ինչպես նաև ՀՀ նախկին վարչապետ Կարեն Կարապետյանը:
Քաղաքագետ Ռուբեն Մեհրաբյանը նորմալ չի համարում այն հանգամանքը, որ Հայաստանում նման բարձր պաշտոն զբաղեցնող անձն այժմ ընդգրկվում է ՌԴ կառավարությանը կից փորձագիտական խորհրդի նախագահության կազմի մեջ։ «Առաջին լրատվական»-ի հետ զրույցում Մեհրաբյանը մասնավորապես նշեց. «Բայց ավելի նորմալ չէ և շատ տխուր է այն գիտակցումը, որ Հայաստանում նախկինում բարձրագույն պետական պաշտոններ են զբաղեցրել մարդիկ, որոնք մինչ օրս այդպես էլ չեն պատկերացնում ու չեն հասկացել, թե իրենք ինչ պաշտոն են զբաղեցրել»։
Մեհրաբյանի դիտարկմամբ՝ Կարեն Կարապետյանն իր համար շատ հոգեհարազատ պաշտոն գտավ. «Սա ուղղակի դաս պետք է լինի մեզ, որ բարեվարքության մեր պատկերացումները վերանայենք։ Երբ մարդիկ պաշտոններ են զբաղեցնում Հայաստանում կամ պետք է զբաղեցնեն՝ բարեվարքության ստանդարտները հասարակությունը և քաղաքական էլիտան պետք է լավ պատկերացնեն ու ունենան ֆիլտրեր, որպեսզի նման մարդիկ շանս չունենան Հայաստանում որևէ պաշտոն զբաղեցնելու»։
Փաստորեն Մոսկվան ապաստան է տալիս քրեական տարբեր գործով անցնող Հայաստանի նախկին պաշտոնյաների, որևէ գործով չանցնող այլ պաշտոնյայի էլ պաշտոն է տալիս. սա խոսո՞ւմ է ռուսական վերաբերմունքի մասին՝ հարցին ի պատասխան քաղաքագետն արձագանքեց. «Այսպես կոչված հայ-ռուսական բարեկամությունը և Ռուսաստանը, որպես պետություն, դառնում են Հայաստանում բոլոր ստահակների վերջին հանգրվանը»։
Քաղաքագետ Արկադի Վարդանյանի կարծիքով՝ Ռուսաստանն այս կերպ շնորհակալություն է հայտնում Կարեն Կարապետյանին իր մատուցած «ծառայությունների» դիմաց: «Մեր հեղափոխությունը թույլ չտվեց, որ նա այստեղ արմատներ գցի, իր սև գործը շարունակի, դրա համար էլ գնաց Ռուսաստան ու պաշտոն ստացավ. իրենց ագենտն է, ինչո՞ւ չպետք է ստանար որ»,- «Առաջին լրատվական»-ի հետ զրույցում ասաց նա։
Շարունակելով՝ քաղաքագետը նշեց. «Ամբողջ քաղաքակիրթ աշխարհը վաղուց Ռուսաստանը համարում է թունավոր երկիր, ահաբեկչություն նախաձեռնող, ահաբեկչությանը մասնակցող և ֆինանսավորող երկիր։ Այդ մասին գիտի ամբողջ աշխարհը, և պատահական չէ, որ պատժամիջոցները վեց ամսով երկարաձգել են, պատահական չէ հերթական դոպինգային սկանդալը, որի արդյունքում Ռուսաստանը 4 տարով զրկվեց միջազգային սպորտային մրցույթներին մասնակցելու իրավունքից։ Աշխարհն այդ մասին գիտի, բայց ցավն այն է, որ մեր հասարակության մի ստվար զանգված դա չգիտի, հին պրոպագանդայով են առաջ շարժվում»։
Արկադի Վարդանյանը հավելեց. «Հանցագործներին միշտ էլ նման վերաբերմունք է ցույց տալիս Ռուսաստանը։ Իմ դեմ սուտ քրեական գործեր էին հարուցել ինչպես 2000-ին, այնպես էլ 2013 թվականին. բոլորը, ովքեր դրան անմիջականորեն մասնակցում էին, Ռուսաստանում պաշտոնական առաջխաղացումներ են ունեցել։ Դա իրենց ոճն է, բայց ես չգիտեմ՝ ինչո՞ւ են մեր իշխանությունները քնած մնացել։ Մի՞թե չեն հասկանում, չեն կարողանում վերլուծել՝ զարմացած եմ»։
Լուսանկարը՝ Armeniasputnik-ի