Լիբիայի ազգային բանակը (ԼԱԲ) շարժվում է դեպի Տրիպոլի, որը վերահսկվում է Ազգային համաձայնության կառավարության կողմից, հրամանատար Խալիֆա Հաֆթարի կողմից վճռական հարձակման մեկնարկի մասին հայտարարությունից հետո, հաղորդում է «Ալ-Արաբիա» հեռուստաալիքը՝ հղում անելով սեփական թղթակցին:
Հինգշաբթի երեկոյան ԼԱԲ-ի հրամանատար մարշալ Խալիֆա Հաֆթարն իր տեսաուղերձում հայտարարել է վճռական ճակատամարտի մեկնարկի և Տրիպոլիի կենտրոն առաջխաղացման մասին՝ այն ազատագրելու նպատակով: Նա կոչ է արել նրանց, ովքեր պայքարում են ԼԱԲ-ի դեմ, մնալ իրենց տներում՝ երաշխավորելով նրանց անվտանգությունը:
ԼԱԲ-ի տեղեկատվական գրասենյակը, որին հղում է անում հեռուստաալիքը, հայտարարել է Լիբիայի մայրաքաղաքի հարավում գտնվող Սալահ էդ-Դին թաղամասում գտնվող ոտիկանության սպաների պատրաստման ուսումնարանը վերահսկողութան տակ վերցնելու մասին:
Միևնույն ժամանակ, Տրիպոլիում Լիբիայի ազգային համաձայնության կառավարության կողմից վերահսկվող ջոկատների հրամանատարները, ըստ «Ալ-Արաբիա»-ի, հայտարարել են, որ «Տրիպոլիում օպերատիվ վիճակը վերահսկվում է»:
2011-ին Լիբիայի առաջնորդ Մուամար Քադաֆիի տապալումից և սպանությունից հետո Լիբիայում երկիշխանություն է հաստատվել: Ժողովրդի կողմից ընտրված խորհրդարանը գործում է արևելքում, իսկ արևմուտքում՝ մայրաքաղաք Տրիպոլիում, իշխում է ՄԱԿ-ի և Եվրամիության աջակցությամբ ձևավորված Ազգային համաձայնության կառավարությունը՝ Ֆայեզ Սարաջի գլխավորությամբ: Երկրի արևելյան մասի իշխանությունները գործում են Տրիպոլիից անկախ և համագործակցում են Լիբիայի ազգային բանակի հետ՝ մարշալ Խալիֆա Հաֆթարի գլխավորությամբ:
