Լուրեր
«Սա տոտալ վերահսկողություն է․ ԱԱԾ-ի  օգնության կանչը՝ ոստիկանությանը»
  • 10:20
  • 2019-12-14
  • Դիտումներ՝ *

«Ես կարծում եմ, որ կարիք չկար այդքան հրատապ այսպիսի  օրենսդրական նախագիծ ընդունել  և  ԱԱԾ-ից բացի նաև ոստիկանությանը հնարավորություն տալ գաղտնալսումներ իրականացնելու։ Գտնում եմ նաև, որ սա կարող է բազմաթիվ չարաշահումների տեղիք տալ, որովհետև մեր փորձը ցույց է տալիս, որ  բազմաթիվ դեպքերում այդ գաղտնալսման հնարավորությունը չարաշահվել է, այսինքն՝ ունեցել ենք անգամ այնպիսի դեպքեր, երբ սկզբում գաղտնալսել են, հետո են դրա համար դատարանի որոշում ներկայացրել։ Կարծում եմ, որ սա իրոք խնդիր կարող է դառնալ և միգուցե նաև տոտալ վերահսկողություն են փորձում սրանով սահմանել։ Սրա  ռիսկերից մեկն էլ այն է, որ մեզանից յուրաքանչյուրը կարող է անգամ ամենաչնչին առիթով կամ նույնիսկ անառիթ ընկնել այդ գաղտնալսումների տակ, ինչպես օրինակ նախորդ իշխանությունների ժամանակ էր արվում»,-«Առաջին լրատվական»-ի հետ զրույցում նշեց փաստաբան Ինեսսա Պետրոսյանը։

Հիշեցնենք, որ Ազգային Ժողովը դեկտեմբերի 9-ի նիստում 80 կողմ, 19 դեմ և 0 ձեռնպահ ձայների հարաբերակցությամբ առաջին ընթերցմամբ ընդունել է «Օպերատիվ-հետախուզական գործունեության մասին» օրենքում փոփոխություններ կատարելու վերաբերյալ նախագիծը, որով նախատեսվում է, որ ոստիկանությունը նույնպես կկարողանա գաղտնալսում իրականացնել։

Ներկայումս գործող իրավակարգավորումներով գաղտնալսման գործառույթը վերապահված է Ազգային անվտանգության ծառայության համապատասխան ստորաբաժանմանը: Փոփոխության արդյունքում ոստիկանությունում նույնպես ստեղծվելու է նույնատիպ ստորաբաժանում:

 

Մանրամասները՝ տեսանյութում։

  • Դիտումներ՝ *