Ֆրանսիայի վարչապետ Էդուար Ֆիլիպը ներկայացրել է կենսաթոշակային բարեփոխումների նոր նախագիծը: Այդ մասին հայտնում է Le Monde-ն:
Ինչպես նշվում է փաստաթղթում, կենսաթոշակային տարիքը դեռ կկազմի 62 տարին: Այնուամենայնիվ, եթե մարդը թողնում է աշխատանքը մինչև 64 տարեկան հասնելը, ապա նրա վճարումները կրճատվելու են: Միևնույն ժամանակ, փոփոխությունները կկիրառվեն 1975 թվականին և ավելի ուշ ծնվածների համար, մնացածի համար հաշվարկը կմնա նույնը:
Ֆիլիպը կարծում է, որ նոր համակարգը օգտակար է նրանց համար, ովքեր առաջին անգամ աշխատանքի կընդունվեն 2022 թ. «Այս որոշումը թաքնված օրակարգ չունի: Մենք պարզապես ուզում ենք պաշտպանել երկրի աշխատողներին և թոշակառուներին»,- շեշտել է վարչապետը:
Նա հավելել է, որ ներկայիս համակարգը, որում առկա է բնակչության տարբեր շերտերի համար 42 տարբերակ, չափազանց խճճված է: Վարչապետի հայտարարությունները արվել են երկրում արդեն 2 շաբաթ տևող լայնամասշտաբ բողոքի ցույցերի ֆոնին։