Սահմանադրական դատարանի դատավորների վաղ կենսաթոշակի անցնելու վերաբերյալ օրենքի նախագիծն ընդունվել է: Ինչպես գիտեք՝ այս օրենքով դատավորներին առաջարկվում է կամովին հրաժարական, աշխատավարձի պահպանում մինչև թոշակային տարիք: Կա իհարկե նաև պայման՝ պետք է հրաժարական ներկայացնել մինչև 2020թ. հունավարի 31-ը:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Գառնիկ Գևորգյանը, քաղաքագետ Սուրեն Պետրոսյանը և «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:
«Չեմ կարծում, որ այս օրինագծով Սահմանադրական ճգնաժամի խնդիրը լուծվելու է. այն գործոնները, որոնք առաջացրել են այդ ճգնաժամը, ինստիտուցիոնալ, համակարգային են: Բայց իշխանությունը գնում է համակարգային խնդիրներն անձերի միջոցով լուծելու ճանապարհով, որը ի սկզբանե դատապարտված է: Գրեթե վստահ եմ, որ այս տարբերակը չի աշխատելու և կարծում եմ, որ իշխանությունը մտնելու է «կրկին փորձիր» ռեժիմի մեջ»,- նշեց Գառնիկ Գևորգյանը:
ԱԺ փոխնախագահն այսօր ասել է՝ եթե մեր մեկնած ձեռքը կբռնեն, լավ, եթե չեն բռնի, մյուս ձեռքը կմեկնենք: Անդրադառնալով այս դիտարկմանը և հարցին, թե ինչն է ստիպում կառավարությանը այդպիսի մարդասիրական ժեստերի դիմել՝ Գ. Գևորգյանը նշեց, որ կառավարությունն այդ քայլին դիմում է անճարությունից: Վերլուծաբանի գնահատմամբ՝ այս խնդիրը քաղաքական է:
Սուրեն Պետրոսյանի խոսքով՝ կարևոր է նաև մեկ խնդիր. «Մեր իշխանությունը դուրս չի գալիս իրավիճակային կառավարման տրամաբանությունից: ՍԴ ճգնաժամն առանձին խնդիր չէ, դա դատական համակարգի ճգնաժամի հետևանք է: Ամեն կերպ փորձում է արվում խուսափել դատական համակարգի բարեփոխումներից»:
«ՀՀ քաղաքացիները չեն վստահում դատական համակարգին, սա ամենացածր վստահություն ունեցող ինստիտուտն է. սա գլոբալ խնդիր է, և ՍԴ-ի խնդիրն ամենակարևորն է: Պետք է ունենալ այնպիսի ՍԴ, որը կանգնած կլինի ՀՀ քաղաքացիների մեջքին, պաշտպանի նրանց իրավունքներն ու շահերը»,- նկատեց Դանիել Իոաննիսյանը: Նա նաև հավելեց, որ ՍԴ ճգնաժամը հետևանք է տարիներ շարունակ պետության զավթման: «Առաջին քայլը, որ պետք է արվի, պետք է քաղաքական գնահատական տրվի մինչև 2018թ. վերջին տասնամյակների դեպքերին, դրանից բխող գործողությունները տրամաբանական կլինեն»,- ընդգծեց Դ. Իոաննիսյանը՝ հավելելով, որ զավթման հետևանքները պետք է վերացնել:
Մանրամասն՝ տեսանյութում: