Ալբանիայի, Թուրքիայի, ինքնահռչակ Կոսովոյի և Խորվաթիայի դեսպանները բոյկոտել են Նոբելյան մրցանակի հանձնման արարողությունը ավստրիացի գրող Պիտեր Հանդկայի պարգևատրման պատճառով՝ հայտնում է Dagens Nyheter-ը։
Արարողությանը ավանդաբար հրավիրում են Ստոկհոլմում տեղակայված բոլոր դեսպանատների ղեկավարներին:
Դեսպանների՝ միջոցառմանը մասնակցելուց հրաժարվելու պատճառն այն է, որ նախկին Հարավսլավիայի տարածքում տեղի ունեցած պատերազմի ժամանակ Հանդկեն բացահայտորեն արտահայտել է իր սերբական դիրքորոշումը և աջակցել է Սերբիայի այն ժամանակվա նախագահ Սլոբոդան Միլոշևիչին: Միևնույն ժամանակ, գրողը հերքում է մեղադրանքները, թե իբր ինքը չի ճանաչում Սրեբրենիցայում տեղի ունեցած ողբերգությունը:
«Միլոշևիչի քաղաքականությունը հանգեցրեց նախկին Հարավսլավիայի պատերազմի, որը հանգեցրեց հազարավոր մարդկանց մահվան և տարածաշրջանում շարունակվող անկայունության»,- լրագրողներին բացատրել է Խորվաթիայի դեսպանը:
Անցած գիշեր Ստոկհոլմի կենտրոնում անցկացվել է բողոքի ցույց ընդդեմ Հանդկայի՝ Նոբելյան մրցանակակիր լինելուն: Դրան մասնակցել է մոտ 400 մարդ: