«Մեր կյանքը շատ խայտաբղետ է, կան լավ և վատ կողմեր: Լավն այն է, որ կան ակնհայտ փոփոխություններ, ասենք՝ ճանապարհները նորոգվում են, մանր օղակներում կոռուպցիա չկա, ունենք արդար ընտրություններ, ասում են, որ տնտեսական 7 տոկոս աճը կա, դա ես չեմ զգում, կան աղմկոտ իրադարձություններ՝ սրան են բռնում, նրան են բռնում, դա էլ վատ չէ, «լազաթ» է տալիս»,- այս մասին «Առաջին լրատվական»-ի հետ զրույցում ասաց դերասան, քաղաքական սատիրիկ Սերգեյ Դանիելայնը:
«Վատը երկակի ստանդարտներն են, որ կարող է ասվել մի բան, արվել այլ բան,-շարունակեց դերասանը,- բերեմ մի օրինակ, որը ոչ թե քաղաքական, այլ մարդկային և բարոյական մակարդակի վրա է. շուքով հարսանիք եղավ, պսակվեցին Ծառուկյանի և Սուքիասյանի բալիկները, և վարչապետը մասնակցեց նրանց հարսանիքին: Նիկոլի կողմից «պրապուսկատ» էր այդ հարսանիքին գնալը: Դա առաջ ընդունված էր, բայց հիմա անընդունելի է… Նոր Հայաստանում դա չի ընկալվում. ո՞նց պիտի մարդու հետ նստես սեղան, հետո ասես՝ Մարտի 1-ի գործի հետ առնչություն ունի կամ կոռուպցիոներ է և այլն… Սա երկակի ստանդարտ է կոչվում, ամոթ վարչապետին: Մի բան էլ ասեմ՝ եթե նա վարչապետ չլիներ, նրան չէին էլ հիշի, կասեին՝ կողքովս մի՛ անցի էլի քո տրաքած օփելով, ինչ կլինի, մենք մերոնցով ենք, դու ինչ գործ ունես»:
«Մեր իշխանությունը, ինչպես և բոլոր իշխանությունները, ունի մի վատ մոտեցում՝ միայն իրենք են ճիշտ: Բայց կան արտախորհրդարանական ուժեր, որ կարող են խորհուրդ տալ որևէ բան բարեփոխելու, բայց չէ, նրանք իրենց ավանակն են առաջ քշում»,- նկատեց Ս. Դանիլեյանը: Նա նաև հավելեց, որ քննադատելով իշխանությանը՝ չի պատկերացնում նախկին իշխանության վերադարձը. «Չեմ պատկերացնում, որ նախկինները՝ փտած արգանդներից դուրսպրծուկները պիտի վերադառնան»:
Խոսելով քաղաքական դաշտում առողջ, կառուցողական ընդդիմության անհրաժեշտության մասին՝ դերասանը նշեց, որ իր դիտարկմամբ՝ ԲՀԿ-ն ունի միայն փողի ռեսուրս. նա միշտ իշխանության մի գողտրիկ անկյունում է գտնվում: Իսկ «Լուսավոր Հայաստանը» մի քիչ ավելի ընդդիմություն է, քան ԲՀԿ-ն, չունի նման ֆինանսական ռեսուրս. «Բայց առողջ ընդդիմություն կձևավորվի խորհրդարանից դուրս. հետաքրքիր մտածող երիտասարդներ կան, կհավաքվեն»:
Մանրամասն՝ տեսանյութում:
