Ազգային ժողովը երկրորդ ընթերցմամբ և ամբողջությամբ ընդունեց Ճանապարհային երթևեկության կանոնակարգման բալային համակարգի ներդրման օրինագիծը: Թեմայի շուրջ զրուցելու համար «Առաջին լրատվական»-ը հյուրընկալել է «Վարորդի ընկեր» ՀԿ համահիմնադիր Սերգեյ Ղահրամանյանին և ԱԺ «Իմ քայլը» խմբակցության պատգամավոր Նիկոլայ Բաղդասարյանին:
«Բալային համակարգը փորձ է՝ զսպելու այն վարորդներին, ովքեր երթևեկության մեջ իրենց դրսևորում են ոչ դրական վարքագծով, ինչի հետևանքով ցավալի դեպքեր են տեղի ունենում»,- ասաց Սերգեյ Ղահրամանյանը և հավելեց, որ մահացությունների թվով Հայաստանը Եվրոպայում համարվում է «առաջատար»:
Նրա խոսքով՝ կարգապահ վարորդները միշտ էլ անկարգապահների պատճառով տուժում են. «Բալային համակարգը առաջին մեծ ռեֆորմներից է Հայաստանի երթևեկության ոլորտում: Նախկինում այս բալային համակարգը չէր կարող ներդրվել, որովհետև սրա արդյունքում ֆինանսական մուտքերը բյուջե տարեկան պակասելու են շուրջ 7 մլրդ-ով. նախորդ իշխանության համար դա անթույլատրելի կլիներ: Բալային համակարգով ժողովրդից պակասում է ֆինանսական բեռը՝ խախտումներ կան, որոնց դեպքում շուրջ 200-300 անգամ պակասում է»:
ԱԺ պատգամավոր Նիկոլայ Բաղդասարյանը հավելեց. «Աշխարհի մակարդակով գրավում ենք 76-րդ հորիզոնականը ավտովթարների հետևանքով մահացու դեպքերով: Այս ցուցանիշը ցույց է տալիս, որ մենք վարելու կուլտուրայի խնդիր ունենք»:
Նրա խոսքով՝ նախորդ իշխանության ժամանակ շեշտը դրվում էր վարորդի մեղքի վրա՝ առանց ուշադրություն դարձնելու ճանապարհների, երթևեկության ճիշտ կազմակերպման, շրջակա միջավայրի վրա. «Նախկինում վարորդական իրավունքները անգամ նվեր էին տրվում. ընկերը ընկերուհուն կարող էր որպես նվեր տալ վարորդական վկայական»:
Հարցազրույցն ամբողջությամբ՝ տեսանյութում:
