Հունաստանի ԱԳՆ-ն նամակներ է ուղարկել ՄԱԿ-ի գլխավոր քարտուղարին և ՄԱԿ-ի Անվտանգության խորհրդի նախագահին՝ խնդրելով չճանաչել ծովային գոտիների վերաբերյալ Թուրքիայի և Լիբիայի միջև հուշագիրը և չգրանցել այն, քանի որ այն խախտում է միջազգային իրավունքը, հաղորդել է Հունաստանի կառավարության պաշտոնական ներկայացուցիչ Ստելիոս Պեթսասը երեքշաբթի օրը կայացած ճեպազրույցում:
«Առաջին նամակում շեշտվում է, որ Թուրքիայի և Լիբիայի «համաձայնագիրը» կնքվել է անբարեխիղճ ձևով և խախտում է ծովային իրավունքը, քանի որ Թուրքիայի և Լիբիայի ծովային գոտիները հարակից չեն, և երկու պետությունների միջև չկա ընդհանուր ծովային սահման: Բացի այդ, «համաձայնագրում» հաշվի չեն առնվում հունական կղզիները և նրանց ծովային գոտիներ ունենալու իրավունքը»,- ասել է Փեթսասը:
Նրա խոսքերով, նամակում նշվում է նաև, որ «համաձայնագիրն» անվավեր է, քանի որ այն չի հաստատվել Լիբիայի խորհրդարանի կողմից, ինչի մասին վկայում է Լիբիայի խորհրդարանի ղեկավարի կողմից ՄԱԿ-ի գլխավոր քարտուղարին ուղղված նամակը:
Փեթսասը նաև հաղորդել է, որ դեկտեմբերի 13-14-ը կայանալիք ԵՄ գագաթնաժողովում վարչապետ Կիրիակոս Միցոտակիսը կբարձրացնի թուրքական սադրանքների հարցը: