«Մենք չունեինք փաստեր և հիմա էլ չկան փաստեր, որ քաղաքապետարանի պաշտոնյաներն այդ «ԿամԱԶ»-ների նվիրատվության արդյունքում ֆինանսական օգուտներ են ստացել, այսինքն, երբ խոսվում է կոռուպցիայի մասին, ապա երբեք չպետք է մոռանալ, որ կոռուպցիոն հանցագործության պարտադիր պայմաններից է պաշտոնատար անձի կամ անձանց ներգրավվածությունն այդ գործընթացի մեջ, որոնք արդյունքում անձնական օգուտ են ստացել։ Եվ այս իմաստով՝ կրկնում եմ, որ չկա որևէ փաստ, որ քաղաքապետը, փոխքաղաքապետերը կամ քաղաքապետարանի որևէ պաշտոնյա այդ մեքենաների ստացումից անձնական օգուտներ է ստացել, այլ դա արվել է քաղաքի մաքրության համար, որպեսզի ավելի շատ աղբատար մեքենաներ լինեն, հետևաբար, եթե ինչ-որ մեկը սա կոռուպցիա է համարում, ապա՝ դա այլ հարց է»,- «Առաջին լրատվական»-ի հետ զրույցում պարզաբանեց «Թրանսփարենսի Ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը՝ անդրադառնալով Երևանի քաղաքապետարանի շուրջ ստեղծված իրավիճակին՝ կապված մասնավորապես աղբատար մեքենաների ձեռքբերման գործընթացի հետ։
Այս համատեքստում Հոկտանյանը նաև հավելեց․ «Բայց, իհարկե, սա չի նշանակում, որ այստեղ կոռուպցիոն ռիսկեր չկան, այսինքն՝ հնարավոր է, որ այդ աղբատարների դիմաց նվիրատուն գուցե ինչ-ինչ առավելություններ կամ արտոնություններ է ստացել, այ սա արդեն կոռուպցիոն ռիսկ է։ Բացի դրանից, մեր կենտրոնի տարածած հայտարարությունից հետո էլ «Լուսավոր Հայաստան»-ի ներկայացուցիչները հայտարարեցին, որ ոչ թե կոնկրետ «ԿամԱԶ»-ներ են նվիրել, այլ փոխանցվել է դրանց համար անհրաժեշտ գումարը։ Եթե իրականում հենց այդպես է եղել, ուրեմն սա նույնպես կոռուպցիոն ռիսկ է»։
Մեր զրուցակիցը վստահ է, որ վերոնշյալ հանգամանքները պետք է իրավապահ մարմինների պարտադիր ուսումնասիրության առարկա դառնան՝ այս մասով առկա կասկածները փարատելու համար։
«Դատախազության պարտականությունն է ստուգել, հասկանալ՝ ինչ է իրականում տեղի ունեցել և Հայկ Մարությանի գործոնը չպետք է նրանց կաշկանդի՝ օբյեկտիվ և բազմակողմանի քննություն իրականացնելու համար»,-նշեց նա։
Մանրամասները՝ տեսանյութում։